New Delhi: U Myntri Sorkar Pdeng u Anurag Thakur mynta ka sngi u la pynbna ba ka khlur akphlim ba pawnam ka Waheeda Rehman kan shah pynkup burom da ka khusnam Dadasaheb Phalke Lifetime Achievement Award na ka bynta u snem 2021. Haba ai jingtip halor kane ka rai, u Myntri u la ong ba u dap da ka jingkmen kaba khraw bad sngew burom ban pynbna ïa kane ka khusnam na ka bynta ka jingnohsynniang jong kane ka khlur akphlim sha ki kam ak phlim jong ka ri.
U Myntri u la ong ba ka Rehman ka la shah ïaroh bha ha ki bynta jong ka ha ki phlim Hindi, kiba kham paw napdeng kine kilong ka Pyaasa, Kaagaz ke Phool, Chaudhavi Ka Chand, Saheb Biwi Aur Ghulam, Guide, Khamoshi bad shibun kiwei kiwei. Halor ka jingtbit jong ka ha ka kam, u Myntri u la ong ba “ha ka kam ak phlim jong ka kaba la palat sanphew snem, ka la pyni ïa la ka jingtbit jong ka ha ki kam ba ka trei, kaba la ïalam sha ka jingïoh ïa ka National Film Award ha ka bynta jong ka ha ka phlim Reshman bad Shera. Ka nongjop ïa ka khusnam Padma Shri bad Padma Bhushan, ka Waheeda ji ka la pyni ïa ka nuksa jong ka jingaiti, jingkut jingmut bad ka bor jong ka Bharatiya Nari ba lah ban ban kot sha ki kliar jong ka jingtbit lyngba ka jingtrei shitom jong ka.”
Da kaba kdew ba ka khusnam sha kane ka actress ba pawnam ka wan mar syn ïoh jingmynjur ïa ka Nari Shakti Vandan Adhiniyam, u Myntri u la ong ba “ha ka por ba la mynjur ïa ka Nari Shakti Vandan Adhiniyam ha Parliament, ka jingïoh khusnam lifetime achievement award jong ka, kadei ka jingai jingithuh ïa kawei na ki longkmie kiba tbit tam jong ka India ha ki kam ak phlim bad ka longkmie kaba la aiti ïa la ka jingim ha ki kam ak phlim na ka bynta ka jingïarap ïa kiwei bad ka bha ka miat jong ka imlang sahlang.”
Yn sam ïa ka khusnam ha ka jingrakhe ïa ka 69th National Film awards.
Ki dkhot harum kidei kiba don ha ka Dadasaheb Phalke Award Selection Committee:
1. Ka Asha Parekh
2. U Chiranjeevi
3. U Paresh Rawal
4. U Prosenjit Chatterjee
5. U Shekhar Kapur
Katba dang ïaid ki snem, kane ka nongak phlim ka la ïoh ïa ki jingjop ba kiwei kiwei ki longkmie kiba ak phlim na kato ka juk kim pat ïoh. Lyngba ka jingtbit jong ka ha ka kam, ka Waheeda Rehman ka la jop shibun ki khusnam. Ka la jop ïa ka khusnam Filmfare Best Actress Award na ka bynta ka Guide (1965) bad Neel Kamal (1968). Kane ka actress ka la jop ruh ïa ka National Award for Best actress (1971) bad ka la shah pynkup burom da ka khusnam Padma Shri ha ka Sorkar India ha u snem 1972, hadien ka la ïohpdiang ruh ïa ka khusnam Padma Bhushan ha u snem 2011. Ka Waheeda Rehman ka la ak ha palat 90 tylli ki phlim, ha palat san phew snem bad ka la shah ïaroh bha.
