Shillong, Nailur 26 : U Myntri ka tnad PHE, Marcuise N Marak ha ka sngi Ba-ar u la pyntip ba ïa ka Bulk Water Supply Scheme kaba la mynjur da ka sorkar pdeng hapoh ka North East Infrastructure Development Scheme (NESIDS) kan ïarap ban ïakhun ïa ka jingkyrduh um kaba mad da ka nongbah Tura.
Haba kren bad ki lad pathai khubor, u Myntri u la ïathuh ruh ba katei ka skim hapoh ka NESIDS la mynjur ha ka jingïalang kaba long hapdeng ki ophisar jong ka sorkar pdeng bad ki ophisar ka sorkar Meghalaya.
“Kumta, ngi don ka jingkyrmen ban pynbeit noh ïa kane ka ishu kaba ïadei bad ka jingkyrduh um ba kynduh da ki nongshong shnong ka nongbah Tura,” u la ong.
Haba ïadei pat bad ka Tura Water Supply Scheme, u Myntri u la ïathuh ba ka projek ka la shah pynthut noh na ka daw ka jingtyrkhong noh ka tyllong um ha ka por rkhiang.
“Ngi mad ruh ïa ka jingthut ka bording bad dei na kata ka daw ngim lah ban tan ïa ka um na ka wah Ganol. Kine ki dei ki dawbah kiba ngi mad ïa ka jingkyrduh um ha nongbah Tura,” u la bynrap biang.
