Da ka Community Accord ïasoi ka Sorkar bad ki bor shnong ban ïakhun pyrshah ïa u drok lyngba ka DREAM

Shillong, Nohprah 05 : Ka Sorkar Jylla, ki Bor Synshar Shnong bad ki Nongïalam Niam, ki la ïasoi da ka Community Accord, ba pynkup bor ban ïa ïeng tylli kawei ha ka ban ïakhun pyrshah ïa u drok lyngba ka Drug Rehabilitation, Elimination and Action Mission (DREAM) ha Jylla Meghalaya.
ïa kane ka Accord la ïasoi ha ka prokram jong ka Tnad Social Welfare kum shibynta jong ka prokram ba dang shu pyllait shen ïa ka Drug Rehabilitation, Elimination and Action Mission (DREAM) bad ka Bringing Unity in Locale Against Drugs (BUILD), ban wanrah ïa ka jingïatylli kawei hapdeng ki bor synshar Shnong , ki Nongïalam Niam lem bad ka Sorkar, ha ka jingïakhun pyrshah ïa u droks kaba la long mynta ka sngi Ba-ar ha U Soso Tham Auditorium State Central Library.
Ha kane ka prokram, ka Sorkar ka la ai jingïarap song pisa ruh sha ka Mawlai Dorbar 6 lak tyngka ban pynïaid ïa ki Rahabilitation Camp, ba la buh da ka Dorbar, ka ban pynshlur ïa kiwei ki Dorbar Shnong ba kin shim lang ïa kajuh ka sienjam ha kylleng ki jaka ka Jylla.
U Myntri Rangbah ka Jylla Conrad K Sangma ula pynshongkun ïa kane ka prokram kum u kongsan ha ka jingïadon lang u Myntri ka Tnad Social Welfare Bah Paul Lyngdoh, ka Myntri ka Koit ka Khiah Kong Ampareen Lyngdoh, u Director General of Police Dr LR Bishnoi bad kiwei kiwei.
Haba kren ha ka jingïalang, u Myntri Rangbah ula ong ba ki samla ki dei ka spah bah ïa ka Jylla bad ka Ri ban kyntiew ïa ka ïoh ka kot.
“Shibun bah ki policy bad ki prokram jong ka Sorkar ki dei kiba phai khmat sha ki samla ba kin ïoh ïa ka policy kaba khlaiñ kaba long kongsan na ka bynta ki khun samla jong ngi” ula ong.
U Myntri Rangbah ula ong ba ki Khynnah kim shym la ïoh bha ïa ka jingsneng jingkraw ha ka por kaba dei bad kane ka dei kawei na ki daw kaba ïalam ïa ki sha ka lynti ban dih ïa u droks.
Ula batai bniah ruh ba kumno ki prokram bapher bapher jong ka Sorkar Jylla ha ki kam ïalehkai, ka put ka tem, ka seng kam seng jam ka ïasnoh bad ki samla khnang ba kin lah ban pyndonkam ïa ki sap jong ki ha ki kam kiba tei bad ban ym ngop ha u drok. “Shisien ba ki la sngewthuh ïa ka nongrim bad ka thong ha ka jingim, kin sa pynleit jingmut bad trei shitom ban kynjoh ïa kata ka thong” ula ong.
U Myntri Rangbah ula pynbna ruh ba ha ka CM Elevate Prokram, kan sa don ruh ka bhah ïa ki seng kiba ïeng ïakhun pyrshah ïa u drok bad ïa ki briew ba la lait na u kynjri jong u drok ba kin seng kam seng jam lajong.
Haba kren halor ka BUILD prokram, u Myntri Rangbah ula ong ba ka Meghalaya ka don ïa ki bor synshar shnong kiba khlaiñ bha bad ki nongïalam shnong ki shim ïa ka bynta kaba khraw bha ha ka imlang sahlang ha ki shnong ki thaw.
“ïa ka kam kum u drok, ki Dorbar Shnong ki dei kiba kongsan bha ym tang ban pynduh ïa u drok hynrei ban ai jingïarap ruh ïa ki nongdih ba kin lait noh na une u jingdih ba sniew bad ruh ban lah pynlong ïa ka DREAM kum ka Mission kaba jop” ula ong.
Ula bynrap ba katba ka Tnad Pulit, ka Koit ka Khiah bad ka Social Welfare ki donkam ban ïatreilang, ka long ruh kaba kongsan ban ïatreilang bad ki Dorbar Shnong. Ula ban jur ruh ïa ka jingkongsan ban kren ïa ki nongdih drok da ka jingsngew synei bad jingieid ym ban pynlong sohpdung ïa ki.
U Myntri ka Tnad Social Welfare u Bah Paul Lyngdoh ula ong ba ka Sorkar ka la ïaleh kat kaba lah ban pynthikna ïa ka jingpynduh jait ïa u drok na Meghalaya. Ula ai khublei ruh ïa ki Seng trei monsngewbha, ki Seng Niam bad ki Dorbar Shnong kiba la ai ka jingkyrshan ha ka jingïakhun pyrshah ïa u drok ha Jylla.
Kiwei pat kiba la kren ha kane ka jingïalang ki kynthup ïa u DGP ka Jylla Dr LR Bishnoi bad kiwei kiwei.