Lada pynkylla Syllabus naduh u 2024, ngin duhnong da ki klur, ong ki nongdie kot

Shillong, Nohprah 05: Ka kynhun jong ki nongdie kot kaba don kumba 30 ngut eiei kiba die na kylleng kylleng ki District jong ka jylla, ki la pynpaw ka jingsngewkhia ïa ka jingthmu ka sorkar ban pynkylla ïa ka Syllabus na ka MBoSE sha ka NCERT.
Lah ban kdew hangne ba ka kynhun myntri jong ka sorkar Meghalaya ha ki bnai baladep, ka la rai ban pynkylla noh ia ki syllabus jong ka MBoSE sha ka NCERT da kaba aidaw ba ki kot jong ka MBoSE kim ïahap kyrdan shuh bad ki jingpule jong kiwei pat ki bynta jong ka ri India.
Na ka liang jong ki nongdie kot, ki la phah da ka jingthoh sha u Myntri Rangbah ka jylla, ha kaba ki la kyrpad ïa u ba un pynsangeh noh shuwa bad la kumno kumno ban sdang noh ka jingpyntreikam ïa ka syllabus thymmai ha u snem 2025.
Ka daw kaba kine ki nongdie kot ki la ai ka long, ba ka jingpyntreikam ka la kloi bad kyrkieh palat, ha kaba na ka liang jong ki, ki dang sah bun ki kot jong ka MBoSE bad lada pyndonkam noh da ki kot ba thymmai, shano kin buh ïa kine ki kot kiba rim bad khlem pep kan ktah jur ïa ki namar ba ki la pyllut da ki klur tyngka.
Nangta kawei pat ka daw ba ki la ai ka long ba ki kot SSA kiba la pynkhreh da ka MBoSE kiba ladep shon lane thied naduh ki snem baladep, kidei ban sam ha u snem 2024. Te lada pynkylla noh sha ki kot jong ka NCERT shano yn buh ïa kine ki kot bad kane kan ktah shibun eh ïa ka jingpyllut jong ki.
Shuh shuh ka kynhun ki nongdie kot ka la ong ruh ba ka jingwan ka COVID 19 ka la ktah shibun eh ïa ka kamai kajih jong ki bad ki dang ïaksaid haduh mynta ban lait na kane ka jingktah ha ka liang ka kamai kajih bad lada pyntreikam noh ïa ka jingpynkyllla syllabus kan ktah shibun ia ki.
Kumta na ka liang jong ki, ki kyntu ïa u Myntri Rangbah ban pynsangeh shuwa ka jingpynkylla syllabus ha u snem 2024 bad ban pyntreikam naduh u 2025.