Da ka Common Platform ïa ki kyrtong MDC-JHADC, yn pynlong ka DS Khimusniang haka 14 tarik

Jowai, Rymphang 05: Kumba ju long ha ki snem kiba la dep hadien ka jingshim rai jong ka Dorbar Shnong Khimusnaing (DSK), Jowai naduh u snem 2019 ba na ka bynta ka jingïalap Election MDC lane MLA la rai ban pynlong tang da ka Common Platform, ha kaba ki kyrtong kin lah ban wan lang ha ka juh ka sngi, ka por bad jaka na ka bynta ban ai ka jingpynsngewthuh ïa ki nongshong shnong shaphang ka jingthmu bad ka nongrim jong ki.
Kumta ha kane ka kynti ruh na ka bynta ka Elekshon sha ka ïing Dorbar jong ka JHADC (Member of District Council) 2025, ka Dorbar Shnong Khimusniang lyngba ka jingpyllait khubor jong u Waheh Shnong ma Titus Bamon, la pyntip ba ka shnong kan pynlong ïa kane ka Common Platform ba shisngi kata haka 14.02.2024 (Friday).
Ïa kane ka Common Platform yn pynlong ha Indoor Sports Hall jong ka Shnong haka por 7:30 PM, ha kaba la kyntu ïa ki kyrtong (MDC Candidate) ba kin bud beit bud ryntih ïa ki kyndon pynïaid shnong, khnang ba ka kam kan long kaba ïaid beit ïaid ryntih.
Ka DS Khimusnaing kala pynbeit ban ym shah ïa ki Candidate ban ïalam lang ïa ki paitbah kiba nabar shnong. Yn shah tang san (5) ngut ki briew kynthup ïa u wei u wei u Candidate bad 2 tylli ki kali. Yn shah tang ïa u Candidate ban ai jingkren bad pynshai ïa la ka jong ka nongrim ïaleh Elekshon jong u bad la ai por 30 minit marwei.
Ïa ka pali jong ki nongkren yn leh da kaba khalai nusip (drawn by lots). Ym shah ïa u ne ka nongkren ban ïabeiñ ïa kynnoh ïa ki wei pat hynrei dei ban kren beit ïa la ka jong ka nongrim. Ka DS kala khang ruh ban ïaid rally ha kano kano ka rukom hapoh u pud u sam jong ka shnong.
Ha kaba ïadei bad ka Election MDC sha JHADC ka Dorbar Shnong Khimusnaing (DSK), Jowai ka hap hapoh ka19-Jowai South Constituency.