Da ka bai mynraiñ khmat byrngem ka ABVP ïa u Vice President ka NEHUSU lada ym lah ban pynshisha

Shillong, Lber 25: Ka Seng Akhil Bharatiya Vidyarthi Parishad (AVBP) kaba dei ka seng ki samla pule ha ka sngi nyngkong ka la kyntait halor ka jingshah kynnoh ba ki dkhot ki donkti ban pynkulmar ïa ka jinglehkmen Holi hapoh ka skulbah North Eastern Hills University (NEHU).
Lah ban ong ba ha ka step jong ka sngi nyngkong, ka la mih ka huri hura ha ka por lehkmen Holi ha NEHU ha kaba u Vice President ka NEHUSU u Samla Easterson Sohtun ula mynsaw malu.
Haba kren sha ki lad pathai khubor ha Shillong Press Club, u State Secretary ka AVBP, u Tengku M Marak ula ong ba kane ka jingkynnoh jong u Vice President ka NEHUSU ka long kaba bakla bad ka bym ïahab satia.
U Tengku M Marak ula kynnoh ba ki don kumba 4 ngut kiba sdang ban rah kti ïa uwei u samla pule da ki tiar pynmynsaw katba ki dang ïalehkmen bad kynnoh ruh ba ki la don jingthmu lypa naduh nyngkong ban pynmih huri hura ha ka por lehkmen Holi.
U la ong ruh ba uwei u samla ba kyrteng u Kamlesh, u khlem rah kti satia ïano ïano ruh hynrei u la leit ban pyn jai jai ha katei ka jingjia kaba la mih ha ka por lehkmen Holi.
“Kane ka jingkynnoh jong u Vice President ka NEHUSU ka long kaba bakla hynrei ha ka jingshisha, ka dei ka kynhun jong u Vice President ka NEHUSU kaba don lypa ka jingthmu ban pynmih ïa ka huri hura,” la kynnoh u Samla Tengku.
U Samla Tengku ula dawa na u Vice President ka NEHUSU ban pynshisha mano, kita ki dkhot ka ABVP kiba pynkulmar bad kiba thmu shoh ïa ki samla pule NEHU bad lada um lah ban pynshisha ka ABVP kan ujor da ka mukotduma pyn mynraiñ khmat (defamation case).
Ha kawei ka liang lah ban ong ba kane ka huri hura kaba la jia ha ka sngi Nyngkong ka 25 Tarik hapdeng u Vice President ka NEHUSU u Samla Easterson Sohtun uba la mynsaw malu mala ha ka jingïapyni bor bad ki nongïalam ka AVBP ha ka jingrakhe leh kmen ïa ka lehniam Holi ha Skulbah NEHU, hadien ka jingpynshai utei u samla Easterson Sohtun sha ki lad pathai Khubor, hynrei tang da ki khyndiat kynta, ka Students Organisation ka Akhil Bharatiya Vidyarthi Parishad (AVBP) ha kajuh hi ka sngi ka la wan ban ïa kynduh ïa ki lad pathai khubor ha Shillong Press Club ban pynshai halor ka jingjia kaba la jia ha NEHU.
Haba kren sha ki lad pathai khubor, na ka liang u State Secretary ka AVBP, u Tengku M Marak u la ong ba kane ka jingkynnoh jong u Easter ka long kaba bakla bad ka bym ïahab satia bad kaei kaba jia namar ula kynnoh ba ka jingthum jong u ym ban wan da ka lynti ka kaba bha hynrei u don ka jingthmu kaba sniew ban pynklumar ha kane ka jinglehkmen Holi.
U la kynnoh ruh ba ki don kumba saw ngut kiba sdang ban rah kti ïa uwei u samla pule da ki tiar pynmynsaw katba ki dang ïalehkmen bad kynnoh ruh ba ki la don jingthmu lypa naduh nyngkong ban pynmih jingïahuri hura ha katei ka jingïalehkmen.