Shillong, Lber 24 : Da ki spah ngut ki nongïalam jong ki samla Congress na kylleng ki bynta jong ka Mylliem Constituency ki la phet noh na ka party kaba ki don baroh shi katta ban leit pynïasoh noh sha ka National People’s Party (NPP) ha ka jingïalang kaba long ha Nongkseh ha kane ka sngi Nyngkong.
Ïa kine ki samla la pdiang burom da ki nongïalam ka party hapoh ka jingïalam jong ki Working President kynthup ïa u Bah Wailadmiki Shylla bad Bah Hamlet Dohling, nangta u Nongai Ktien ka party Bah HM Shangpliang, Bah Banteidor Lyngdoh MLA, Bah Daniel Thangkhiew, Bah Kitborlang Nongrem, Bah Bajop Pyngrope bad kiwei kiwei.
Shwa kane, uwei na ki nongïalam jong ki samla Congress, samla Kerlang Thangkhiew u la ïathuh ba ka daw kaba ki samla Congress ki phaikhmat noh sha ka NPP kadei namar ki ïohi ba lada neh ha ka Congress ka kam bad ka ktien kam poi shaei shaei ruh wat hadien shisnem ba la jop.
“Ka jingmih jongngi kam dei ba ngi ïathut bad u MLA, Bah Ronnie V Lyngdoh hynrei ka thong ba ngi rung ka long ban ïarap ïa kiba duk ba suk namar mynta la shisnem ka kam bad ka ktien kam pat urlong,” u la ong.
Na ka liang u Bah Wailad haba pdiang sngewbha ïa kine kine ki samla u ong ba ka Mylliem ka long kaba donbok haduh katta katta namar watla ka khlem pynjop ïa u Bah Hamlet Dohling kum u MLA pynban ka don pat haduh arngut ki radbah kiba don ha syndah jong u Myntri Rangbah ba kynthup ïa u Bah Daniel Thangkhiew bad Bah Hamlet.
Ha kajuh ka por u la ong pat ba ka rai ba kitei ki samla ki shim kadei kaba paka namar ba mynta ka Congress ha ka ri ka la nang hiar arsut.
Nalorkata, u ong ruh ba ka jingkam ieid jaidbynriew da ki katto katne ki nongïalam kam dei pat ban ïalam bakla ïa ki samla. “Haba ieid jaidbynriew kam dei ban ïalam ïa ki samla sha surok,” u la ong.
U Bah Hamlet pat u la ong ba watla u shah rem ha ka elekshon ba la dep hynrei ka mynsiem jong u ban shakri ïa ki paidbah kam pat shah rem satia. U la pynkynmaw ruh ba dei ma u ryngkat ka sorkar MDA kaba la weng ïa ka jingkyntur pud ka MUDA ban pyntreikam ïa ka aiñ shna iing, kaba dei ka ishu kaba ki paidbah baroh ki la tieng bha ha kito ki por.
“Ha kito ki por nga khlem lum ïa ki paidbah ban leit tur sha Secretariat hynrei lai snem ngi la ïa trei borbah ban weng noh ïa ka MUDA bad aiti noh ha ki District Council ban pyntreikam ïa ka aiñ shna iing. Kane ka la pynmyntoi ym tang ïa ki nong Mylliem hynrei wat ïa kiwei kiwei ki shnong ruh,” u la ong.
U MLA ka Mawkynrew, Bah Banteidor Lyngdoh haba bynrap lang u la ong ba ki sngewkmen ban ïohi ba ka NPP ha Mylliem watla kam shym la jop ha ka elekshon MLA ba la dep hynrei ka ïoh pat ban khring na kiwei pat ki party khamtam ha kane ka por ka jingpynkhreh ïa ka elekshon MP.
Na ka liang u President ka NPYF, Bah Kitborlang Nongrem u la pynpaw ïa ka jingbym sngewlah ngeit ba ki don ki nongïalam seng sainpyrthei kiba nud ba kynnoh ïa ki nongïalam sengbhalang haduh ki nongïalam niam ha ki rynsan ïalap elekshon.
“Kumta ha kane ka elekshon MP kaba don hakhmat mynta ngi kyrmen ba ki samla kin ym shah pynbiej hynrei ban trei borbah na ka bynta ban pynjop ïa ka kyrtong jong ka party, Kong Ampareen Lyngdoh,” u la ong.
U Bah Bajop Pyngrope pat ha ka jngkren jong u, u la ong ba lymda dei na ka jingtuklar jong u Myntri Rangbah ka jylla Conrad K Sangma katta ka jylla kan ym lait na ka CAA.
“Ngi la lait na ka CAA da ka jingtuklar jong u Myntri Rangbah, kiwei pat ki party kin shim kabu ban pynkhihwin ïa kane ka ishu,” u la ong.
Shwa kane, u nongbat ïa ka pla tyngka jongka party, Bah Daniel Thangkhiew u la ïathuh ba ka jingïakren bad kitei ki samla Congress kadei kaba la neh slem bad kumta hadien ba ki la sngewthuh ïa ka thong kaba kum ki samla ki thrang ban trei na ka bynta ka imlang sahlang, da ka mynsiem kaba kylluid ki la rai ban pdiang ïa ki sha ka sem NPP.
