Jowai, Ïaïong 24: Ka East Khasi Hills CA kala khur ïa ka jingjop kaba suk da kaba pynliem kput haduh 167 ron ïa ka West Jaiñtia Hills DCA ha kawei naki jingïalehkai jong ka lympung Under-16 Boys Inter District Cricket Tournament 2025 (Zone-1) kaba la long ha ka sngi Palei (24 tarik Ïaïong, 2025).
Ïa kane ka lympung la pynlong daka Meghalaya Cricket Association (MCA) ïa kaba la pynïaid daka West Jaiñtia Hills District Cricket Association (WJDCA) ha Madan Thad, Mukhla Mission,West Jaiñtia Hills District.
Haba phai sha ka jingïakhun, lah ban ong ba ka EKHCA ka la long kaba khlaiñbor haba nujor bad ka WJHDCA, ha kaba ka EKHCA kala jop suk da 167 ron. Ïa ka jingkynting pisa (toss) la jop da ka EKHCA kaba la kam trai ban tied nyngkong.
Ka EKHCA ka la lah ban kamai 217 ron shuwa ban khyllem baroh 10 wiket haki 44.2 overs. U Danlyson Bareh ula long uba kongsan tam ha kane ka sngi napdeng ki nongtied jong ka EKHCA ha kaba marwei u la lah ban kynjoh tam ïa ka spah ron (108 ron na ki 100 bol) kiba u la bynrap naki 19 tylli ki Fours (4s). Katba u Menang Shangpliang u la noh synñiang 24 ron na ki 30 bol, ba kynthup kawei ka Six (6) bad 3 tylli ki Fours (4s).
Katba haba phai sha ki rangkawang bol jong ka liang pyrshah, sa shi sien pat u Waibhami Ryngkhlem jong ka WJHDCA u la pyni ïaka sap kawang ball jong u, da kaba khur marwei haduh 5 wiket na ki 9.2 ober.
Hynrei ka jingtrei shitom jong u Waibhami Ryngkhlem ha ka bowling ka la long leh nohei namar ba ka WJHDCA kam shym la lah ban poi sha ka thong ha ka pali tied jong ka, ha kaba ki nongtied ki la kyllon uwei hadien uwei.
Ki nongkawang ball jong ka EKHCA ki la lah ban khanglad ïa ka liang pyrshah da kaba ailad kamai tang 50 ron bad ban pynkhyllem baroh 10 wiket ha ki 21.2 ober. U Menang Shangpliang bad u Amit Kumar Rai, ki dei ki arngut ki nongkawang ball jong ka EKHCA kiba seisoh bha mynta da ka ba ïoh ban pynhap mar 3 wiket.
Ïa ka nam Man of the Match la ïoh rah da u Danlyson Bareh uba kamai bun run eh na ka EKHCA.
Ka jingïalehkai mynta ka sngi (Thohdieng) 25-04-2025 kan long hapdeng ka SCA ‘B’ pyrshah ïaka WKHDCA naduh ka por 8 baje shiteng mynstep.
