Jowai, Ïaïong 23: Ka kynhun ïalehkai jong ka Lion S&YA da kaba suk ka la khur ïa ka jingjop pyrshah ïaka Khimusniang SC ha kawei naki jingïalehkai jong ka lympung District Cricket League 2025 bala pynïaid daka West Jaiñtia Hills District Cricket Association (WJHDCA) ha ka sngi Palei (24 tarik ïaïong, 2024) ha Mini Stadium, Khliehtyrshi.
Lah ban kdew ba ka jingïakhun ka la long kaba khlaiñ shilliang hapdeng ka Lion S&YA pyrshah ïa ka Khimusniang SC, ha kaba ka Lion S&YA kala jop suk haduh 162 ron. Ïa ka jingkynting pisa (toss) la jop da ka Lion S&YA kaba la kam trai ban tied shuwa bad ka la lah ban buh ïa ka thong haduh 253 ron naki 35 ovber bad khyllem 4 wiket.
U Nick Dan u la lamkhmat ha ka tied da kaba kynjoh thik ïa ka spah ron (100 ron na ki 76 bol) khlem da shah pynhap haduh kaba kut (not out), kiba u la bynrap naki hynriew tylli ki Six (6s) bad saw tylli ki Fours (4s). Kiwei pat ki ba la noh synñiang haka jingkamai ron ban pynheh ïaka thong ki long u Firstborn Son Dkhar 41 (35), u Deibormi Rngad (C) 29 (24) bad u Tammiki Tariang 27 (55). Ha kawei pat ka liang, u Nibiangmon Sutnga, nongkawang ball jong ka Khimusniang SC ula ïoh ban pynhap 2 wiket na ki 7 ober.
Haba shimti ban beh ïa ka thong, ki nongtied jong ka Khimusniang SC ki la kyllon uwei hadien uwei namar ka jingtbit ki nongkawang ball jong ka Lion S&YA kiba la khanglad ïa ka liang pyrshah ban kamai ron, kane ka la pynlong ïa ka Khimusniang ban kynjoh tang 91 ron katba baroh 10 wiket ki la khyllem lut haki 20.4 ober.
Napdeng ki nongtied jong ka Khimusniang SC dei tang u Ebormi Sutnga uba la ïoh 18 (11), u Mebanroy Bamon 16 (29) bad u Nibiangmon Sutnga 14 (22) kiba lah ban kynjoh sha ka phew ron. U Deibormi Rngad (C), nongkawang ball jong ka Lion S&YA ula tyngshaiñ bha haka bowling da ka baïoh ban pynhap haduh 5 wiket na ki 6.4 overs bad u la ïoh khur ïa ka nam Man of the Match.
Ka jingïalehkai mynta ka sngi Thohdieng (25/04/2025) kan long hapdeng ka Mupliang SC pyrshah ïaka West Jaiñtia Police CC naduh ka por 9 baje mynstep.
