Bym treikam ïa ka 144 CrPC bad ILP, buh ka KSU ïa ka khyrdop talasi ha Ranikor

Mawkyrwat, ‘Naitung, 16: Hadien ka jingbymlah ki bor ba halor kum napoh na ophis jong u Deputy Commissioner jong ka South West Khasi Hills District ban pyntreikam pura ïa ka jingkhang ban iaid ki trok ba kit palat pud lyngba ka kyndon aiñ 144 CrPC, ka Khasi Students Union jong ka Ranikor Circle ha ka 15 tarik u ‘Naitung, 2024 ka la leit ban pynïeng hi ïa ka khyrdop ban talasi ïa ki trok ba pynkheiñ aiñ.
U bah Marconi Thongni, President jong ka KSU Ranikor Circle haba kren ha ki lad pathai khubor u la ong ba ka jingbuh jong ki ïa ka jingtalasi ïa ki trok ba kit palat pud ka long hadien ka jingai por ïa ki mynta la shi taïew ei ei namar da ka jingwan ïaid sa-huh jong ki, ka la pynlong ïa ki surok bad ki jingkieng ban jot kin pra khamtam lei lei ïa ki 7 tylli ki jingkieng dieng ba lada ki jot kan buh jingeh pat ïa ki paidbah ha kaba ïa dei bad ka ïaid ka ïeng jong ki.
Kumta u la buh ka jingkyrpad ïa ki trai jong ki trok ba kim dei ïa leh pyrshah ïa kane hynrei ki dei pat ban kit ym palat ïa ka saw phut khnang ba ki surok kin nym shah ktah than eh. “Ngin ym pyrshah ïa ka jingwan jong ki trok hynrei ki dei pat ban don ka jingïatreilang bad ka seng khnang ba kan nym din jingktah ïa ka ïaid ka ïeng jong kiba bun balang”, ong u bah Marconi Thongni.
Ha kawei pat ka liang, ka KSU Ranikor Circle namar ka jingbym lah ban pyntreikam ïa ka ILP ha ka Jylla Meghalaya, ki la dep ban buh ïa khyrdop talasi bar jylla ha Ranikor, South West Khasi Hills District.
Lah ban kdew ba ka jingbuh jong ka KSU ïa ka khyrdop talasi bar jylla ka long hadien ba ki la ïohi ïa ka jingbymshimkhia ki bor sorkar India ne wat ka Sorkar Meghalaya halor ka jingpyntreikam pura ïa ka ILP bad ka jingbym don ïa kane bunsien la ïohi ba ka jingwan rung kyrthlep ki briew kiba nabar ka la nang jyllei.
Shuh shuh khamtam lei lei hadien ka jingkren ba lap lah jong u Myntri Rangbah ka Jylla Meghalaya, u Conrad K. Sangma uba la kren ba ki briew kiba nabar haba ki wan trei hapoh ka Jylla kim donkam ïa ka work permit bad kane ka jingkren jong u Myntri Rangbah ka la long thik kumba ma u u ai mynsiem ïa ki briew ne ki bar jylla ba kin wan rung sahuh hapoh ka jylla bad lada ai lad ka buh ïa ka jingma kaba khraw ïa ka jylla rit paid bad kan sa long kum ka Jylla Tripura kaba u nongwei u la synshar don bor.
Kumta, kum ka seng kan nym tieng, nym riej hynrei kan ïa khun bad tur shakhmat ban trei ïa la ka kam da kaba khynra napdeng ïa ki briew kiba nabar ki bym wan da ka lynti khnang ba ka pateng ban wan kan shngaiñ.