Khliehriat, Naitung, 16: U Deputy Commissioner ka East Jaiñtia Hills District lyngba u kyrwoh ba la pyllait hynne ka sngi ba Ar u pyntip ba ka jingkhot thep kyrteng /jingai jingmut na ka bynta ka khusnam “Sardar Patel National Unity Award 2024” ka dang iaid shakhmat, bad ka tarik ba khatduh ban phah ïa kane kan long ha ka 31 tarik mynta u bnai.
Ïa kane ka jingthep kyrteng bad jingai jingmut yn pdiang lyngba ka online lyngba ka portal ka Tnad Kam Pohiing ha ka URL https://awards.gov.in
Na ka liang ka Sorkar India ka la pynmih ia kane ka khusnam kaba hakhliehduh jong ki riew paidbah ha ka liang ka jingnoh synniang na ka bynta ka jingiatylli bad ka jinglong janai jong ka Ri India ha ka kyrteng jong u Sardar Vallabhbhai Patel.
Kane ka khusnam ka wad ban aijingithuh ïa ka jingnoh synniang kiba pawkhmat bad kiba ai mynsiem ban kyntiew ïa ka mat jong ka jingiatylli bad ka jinglong janai jong ka Ri bad ban pynskhem ïa ka dor jong ka India kaba khlaiñ bad kaba iatylli.
Kumta la kyntu ïa baroh ki nongshong shnong khlem da pyniapher ïa ka jingngeit niam, jaidbynriew, shynrang kynthei, jaka ba la kha, rta, ki kam ba trei bad kino kino ki jaka pule /kynhun seng ki lah ban aplai îa kane ka khusnam.
