Bym pyntreikam hok ka tnad Tranport ïa ka kuna na ki kali ba pynkheiñ kyndon duhnong 1.23 klur

0

Shillong, Risaw 05 : Ka jingbymlah jong ka sorkar ban pyntreikam ïa ka dor ba thymmai ba dain kuna ïa ki trai jong ki kali kiba pynkheiñ kyndon ka la pynlong ïa ka tnad ban ïoh lum duna haduh 1.23 klur tyngka.
“Na ka daw ka jingbymlah jong baroh ar tylli ki tnad kata ka Transport Department bad ka Enforcement Inspectors ban pyntreikam ïa ka dor kuna ba thymmai na ka tarik ba la pynbna da ka sorkar ka la pynpoi haduh u pud ka jingduh nong haduh 1.23 klur tyngka sha ka pla tyngka jong ka sorkar,” ong ka kaiphod Comptroller and Auditor General of India (CAG) ha ka kaiphod.
La ong ruh ba katkum ki rekod jong ka ophis Commissioner of Transport (CoT) la pynpaw ba ka dor thymmai ba dain kuna katkum ka Motor Vehicle (Amendment) Act (MVAA) la dep ban pynmih da ka Transport Department naduh ka 16tarik Nailur 2019, kata hadien ba la pynslem 15 sngi.
Shuh shuh la ong ba katkum ka kaiphod ba la phah da ka Enforcement Inspector jong ki hynniew tylli ki jaka lum khajna (weighbridges/ check posts) sha ka CoT jong u bnai Nailur 2019 bad Risaw 2019, ki kdew ba wat hadien ba la pynmih ïa ka dor thymmai jong ka kuna, hynrei ki enforcement inspectors kim shym la pyntreikam satia ïa katei ka dor ba thymmai.
La ong ruh ba na ka CoT ha ka jubab ha u Naiwieng 2020 la ong ba ki ophisar ba don ha ki jaka treikam kim lah satia ban ïaid shakhmat ïa ka kam ban dain kuna khlem da ïoh ïa ka jingbthah na ka sorkar namar kane kan wanrah ïa ka jingbymkohnguh na ki paidbah.
Shuh shuh la ong ba ka CoT ka la kdew ba bun kiba pynkhein kyndon ki dei kiba duna ka jingnang jingstad bad kim tip satia ïa kitei ki dor ba thymmai. Kumta ki wan ryngkat ka jingkyrpad ba kim pat tip shaphang katei bad ki duna pisa ban siew ïa ka kuna. Kumta khnang ban lait na ka jingeh bad ruh ban ym thut ka dheng kali la hap ban ailad ïa ki ban siew ïa ka kuna ha ka dor kaba duna wat na ka dor kaba la buh.
Ka CAG ka ong ruh ba ka jubab ba ki ïoh kam dei satia kaba shongnia namar ka dor ba thymmai ban dain kuna ka khlem pyntreikam mardor da ka DTO lane ki enforcement inspector wat hadien ba la ïoh ïa ka jingbthah na ka sorkar Jylla.
Kumta halor kane, la ong ruh ba kadei ka kamram jong ka tnad ban pyntip paidbah ïa ka dor ba thymmai na ka bynta ki kuna bapher bapher na bynta ki trai kali khnang ba kan long ruh ka jingpyntip ban lah pyntreikam pura ïa ki kyndon aiñ.
La ong ruh ba ïa katei ka kam la phah sha ka sorkar naduh u Nohprah 2021 bad haduh mynta ki dang ap ïa ka jubab.

Leave A Reply

Your email address will not be published.