Bym lah thung kam ïa ki trai jaka khang tala ka FKJGP ïa ka Sub-Centre ha Umjaraiñ

Mawkyrwat, Jymmang 12 : Ka Federation of Khasi Jaintia & Garo People (FKJGP) jong ka South West Khasi Hills District ha ka 10 tarik u Jymmang, 2025 ki la leit ban khang tala noh shipor ïa ka Health Sub – Centre kaba don hapoh ka shnong Umjaraiñ, South West Khasi Hills District.
Lah ban pynkynmaw ba ka jingkhang tala jong ka Federation of Khasi Jaintia & Garo People (FKJGP) jong ka South West Khasi Hills District ïa ka Health Sub – Centre kaba don ha Umjaraiñ ka dei hadien ka jingkut noh ka jingaipor ba ka seng ka la ai por ar taïew ïa ka tnad ka koit ka khiah bad ïa ka ophis jong u District Medical & Health Officer (DM&HO), South West Khasi Hills District ba kin thungkam noh mardor ïa ka kong Shidalin Lyngkhoi kaba dei trai jaka kaba ki la ai sngewbha ruh sha ka sorkar ban tei ïa ka Health Sub- Centre naduh u snem 2010 ha ryngkat ka jingïateh soskukar.
Hadien ka jingkhang tala, u bah Enbor Syiemïong, Information Secretary Federation of Khasi Jaintia & Garo People (FKJGP) jong ka South West Khasi Hills District haba kren ha ki lad pathai khubor u la ong ba ka seng na ka por sha ka por ka ju leit ban ïakynduh ïa u DM&HO ban pynsngew halor kane ka bynta bad kumjuh ruh ha ka 17 tarik u Ïaïong, 2025 ka la leit ban ïa kynduh ïa u Deputy Commissioner, jong ka South West Khasi Hills District ba kin pynbeit noh kloi ïa katei ka kam ban thung kam pura noh ïa ki trai jaka hynrei haduh mynta na ka liang jong ki kim shym la patiaw ïa ka jingleit kynduh ryngkat bad ki kot jingthoh jong ka seng.
Kumta, namar ka jingbym suid ñiew ha ka 10 tarik u Jymmang, 2025 kim banse ban leit khang tala noh shipor ïa kane ka Health Sub – Centre tad haduh ba na ka liang ka tnad ka koit ka khiah kan da ïa pynbeit shwa bad ki trai jaka.
Ha kane ka jingleit ban khang tala la synran lang u Coverland Lyngkhoi, Secretary Shnong ka Umjarain lem bad u President ka Seng Samla Shnong Diwah Area.