Bun ngut ki CM nga la treilang tangba kane ka sorkar kaba kham palat : AL Hek

0

Shillong, Naiwieng 06 : U Myntri barim ka sorkar jylla ba dei ruh u MLA ka BJP na Pynthorumkhrah u la ong ba ki paidbah mynta kim sngewtynnad satia ïa ka sorkar MDA ba ïalam da ka NPP namar ka jingjur palat ki kam bamsap.
“Nga la treilang bad bun ngut ki Myntri Rangbah hynrei kane kadei ka sorkar kaba nyngkong eh ba nga lap ha kaba ka jingbamsap kadei shaba palat,” u la kynnoh.
U kynnoh ruh ba ka sorkar MDA kadei ruh kawei na ki sorkar kaba tlot bha ban tehlakam ïa ka shongsuk shongsaiñ ha ka jylla.
“Nga ruh nga dei u dkhot jong ka sorkar hynrei sngewsih ban ong ba ngi la phiel,” u ong da kaba bynrap ba don ki briew kiba leit sha Meghalaya House ha Kolkata ban ai dorkhas kum ka jingpyrshah ïa ka jingbym don ka shongsuk shongsain ha Shillong.
Haba jubab pat ïa kawei pat ka jingkylli, u Bah Hek u la ong ba baroh kiba don ha ka sorkar kynthup ïa u ruh ki hap ban shim lang ïa ka jingkitkhlieh na ka bynta ka jingbymlah tehlakam ïa ka shongsuk shongsain. “Hynrei kito kiba ïalam ïa ka sorkar ki hap ban shim khambun ka jingkitkhlieh halor katei ka phang,”u la bynrap shuh shuh.
Nalorkata, u ong ruh ba ka jingsngewkhia jong u halor kiba bun ki ishu kam dei satia na ka daw ba u shah weng noh na ka shuki Myntri ba ïalam da u Conrad K Sangma kum u Myntri Rangbah. Pynban u ong ba ka rai ba u Myntri Rangbah kadei beit halor ka shithi kaba wan na u President ka BJP, Bah Ernest Mawrie.
“Nga pdiang bad burom ïa kaei kaba la rai namar nga la don ha ka shuki Myntri na ka bynta lai snem shiteng, u (Bah Sanbor Shullai) u don ka hok ban pan lang ïa ka bhah shuki Myntri. Nga la rah bun ki ishu haba ïadei bad ka jingïaid ki trok kit dewiong beaiñ bad ka jingtei ïa ka projek ha MTC Building,” la bynrap shuh shuh utei u MLA ba dei ruh u nongïalam ka BJP ha ka jylla.

Leave A Reply

Your email address will not be published.