Ka jingkiew shakhmat ka jylla ka thong jong baroh ki seng saiñ pyrthei

0

Shillong, Naiwieng 06: Ka Sankardev College ha ka sngi Thohdieng ka la pynlong ïa ka jingïatai ïathir halor ka phang “Party Politics and Political Engagement” ha kaba ki nongïalam na ki seng saiñ pyrthei ha ka jylla ki la wan shim bynta ba ïatai halor kane ka mat ban ban pynshai ruh ïa kaei kaba kum ka jylla ka donkam bad ka jingïohi jngai jong ki kum ki seng saiñ pyrthei.
Ha kane ka jingïatai baroh ki seng saiñ pyrthei ki pynpaw ba ki don tang kawei ka thong kaba ki ïakhun ilekshon kata ka long ka ingkiew shakhmat ka jylla ha ki liang baroh.
Ha kane ka sngi u Bah Manuel Badwar na ka Congress, Dr Fabian Lyngdon na ka AITC, Bah Bajop Pyngrope na ka NPP, Bah Ardent Basaiawmoit na ka VPP, Bah KP Panniang na ka HSPDP, Dr Jemino Mawthoh na ka UDP, Bah Gregory Shullai na ka BJP ki la wan ban pynshai pynsngew kaei kaba ka party kaba ki mih khmat ka don ban kham kyntiew ïa ka jylla lyngba ka saiñ hima sima.
U Bah Manuel Badwar ha ka jingkren jong u u pynsngew ïa kaei kaba ka Congress ki angnud bad kiei ki lynti kaba ki don na bynta ban kyntiew ïa ka jylla. U la ong ba ba kaei kaba donkam tam ha ka ka jylla ba kan kiew shakhmat ka dei beit tang ka jingtreikam kaba shai jong ka sorkar kaba lah ban rah shakhmat ïa ka jingkiew ka jylla.
“Ngi ju ong ïa kiba trei kam sorkar ki shakri sorkar bad kynmaw ki kynrad ka sorkar dei ma ngi, ki lei san snem lei ki dei tang ki ba mih khmat ïa ngi, namarkata, ki nongtrei sorkar ki dei ban buh nyngkong ha khmat ïa u paidbah ha ka jingtreikam jong ki” u la ong.
U la ong ruh ba ka jingeh kaba kum ka jylla ka kynduh ka dei ka jingkyrduhkam ha kaba katba nang heh kyrdan pule ha ka jylla jong ngi katta nang kyrduh kam bad ong ba na ka liang ka Congress kan buh ïa ka ïohkam ki samla ym ha khmat da kaba wanrah ki lad ai kam bad ka jinghikai ba kin ieng ha ki kjat lajong da kaba ïarap bad btin lynti ruh ïa ki.
U Bah Ardent ha ka jingkren u la kdew ba ka jingsahdien ha ka jylla ka dei beit namar ki paidbah kim pat sngewthuh ïa ka iktiar jied nongthaw aiñ jong ki bad ba ka jingjied nongthawa aiñ ruh bunsien la pynshong nongrim ha ka jingïoh pisa na ki kyrtong bad u ong ba kaei kaba kum ka party ki ngeit skhem ba dei tang ka jingjied nongmihkhmat kaba khuid bad ka saiñhima ba lait na ka jingpyndonkam da ka bor pisa ban jop ilekshon ka dei ka jubab ïa ki jingeh ka jylla bad kam ba na ka liang ka VPP kan leit sha u paidbah ruh da kane ka mat.
U Dr Fabian Lyngdoh ha ka jingkren u la pynpaw ïa ka jingbym sngewïahap ïa ka jingong ba kyrduh kam ha ka jylla hynrei ka dei ka jingduna sap ki briew jong ngi ban trei ïa ki kam kiba don hangne.
U la ong ba kane ka jingeh lah ban weng tang lada ngi nang ban jied ïa ki nongïalam kiba don ka jinglah ban ka jingkit khlieh ban leh eiei halor kane.
Haba kren halor ki nongrim ka AITC la ong ba kumba long mynta dei tang kane ka party kaba lah ban ïakhun ïa ki bor ba pyrshang ban pynpharia ïa ka jinglong tylli wat ha ka jigbym long ryntih jong ki nongshong shnong ka jylla bad u la ong ruh ban shu isih beit tang namar ka dei kaba la pun la kha ha West Bengal ka long kaba bakla namar wat ïa ki party naduh Delhi ki paidbah ki ailad bad kyntu ruh ba kin ym don jingsngew khohñioh ïa ka AITC kaba la kha na ka jylla ba don marjan bad ka jylla jong ngi.
U Bah Bajop Pyngrop u la ong ba ha ka saiñ hima jong ka jylla kat haduh mynta dei tang ka sorkar MDA ba la ïalam da ka NPP kaba don ka mon bad ka jingthrang hok ban weng syndon ïa ki jingeh kiba kiwei ki sorkar kim nud ban leh da kaba ai nuksa ïa ka jingpynbeit pud hapdeng ka jylla Meghalaya bad Assam
U la ong ruh ba ki samla kim dei ban kiar ban don bynta ha ka saiñ hima sima namar ka jylla bad ka ri ka donkam ïa ki samla ba kin wan shakhmat ban kit ïa ka khia ka shon ka jylla lyngba ka saiñpyrthei.
Haba kren halor ka thong bad ki kam jong ka HSPDP u Bah KP Panniang u ong ba lada kyrtiang dien sha ki snem mynba u Bah Hopingstone Lyngdoh u dang don u ïeng beit halor ka nongrim ban ïada ïa ka hok ki trai muluk bad ka jingïuhroit ïa ka hok da kibor kiba na shabar.
U la ong ba ha ki 50 snem tam naduh ba la seng kat haduh mynta ka ïeng skhem beit halor ka hok ki trai muluk bad ki nongrim kiba la seng naduh mynshuwa kat haduh mynta ruh kam pat kynriah lynti.
U Dr Jemino Mawthoh u la ong ba ka jingsngew jli ki paidbah tang shu kren shaphang ka saiñ hima sima ka long kaei kaei kaba hap ban kylla noh namar ka jylla ka dawa ïa bun bah ki kam ban leh lyngba ka synshar khadar na bynta jong ki nongshong shnong naduh ka lynti synkien, ka jingkhapngiah ki sor bad kiba bun bah ki jingdonkam bad ong ruh ba kum ka party ki don ka thong bad ka jingangnud kaba bha ïa ka jylla.
Haba kren halor ki nongrim jong ka BJP u Bah Gregory Shullai u la ong ba ka jingsah dien ka jylla ka daw hi ka dei beit namar ki sorkar baroh kiba la dep kim shim khia ïa ka jingkiew shakhmat jong ka bad ong ba da ka jingwan ka BJP kan pyndap ïa kane ka jaka khnang ba ki nongshong shnong ka jylla kin ïoh jingmyntoi.
U la ong ruh ka jingpyntieng pynsmiej da ka jingong ba ka BJP kan pynkylla niam jubor ka long kaba bakla bad ka buit shukor kiwei pat ki party hynrei u ong lada peit ïa kaei kaba ka sorkar pdeng ha ka jingïalam ka BJP ka la leh bun bah ki kam pynroi na bynta ki riewlum bad ki ritpaid baroh ka pyni ba kam don jingshah shiliang ïano ïano.

Leave A Reply

Your email address will not be published.