Bun na ki kyrtong ki kylla nongsam skhim shuwa ka elekshon
Ki paidbah ki dei ban tip bad husiar ba ki kyrtong ki dei ban long MLA shuwa kin sa lah ban sam skhim
Nongpoh, Nohprah 23: Ha kane ka juk ba mynta bun naki paidbah kim pat sngewthuh shaphang ka elekshon bad bun naki kyrtong kiba don ka jingangnud ban ïakhun kiba don ka bor shemphang bad ka jingstad ban thawaiñ bad kiba don ruh ki kyrdan pule kiba biang kim nud ban mih shakhmat ban aireng haka elekshon sha ka ïing Dorbar thawaiñ ka jylla namar ba kim don pisa, hynrei la ñiom bad ther pisa da ki heh spah kiba don ka jingthmu ban ban bat ïa u lakam tang ban kamai spah.
La iohi ruh ba ki kyrtong mynta kila treikam shuwa ban sam ïaki lad jingïarap sha ki paidbah shuwa ba kin long MLA bad ka long kaba sngew thamula ba ki kyrtong tang shu pynbna ba kin ïeng ban ïaleh elekshon, kila don ki kynhun kiba leit pan skhim, pan khiew, bad haba don ki kynhun kiba leit ban pan kali kit ñiut, pynheh madan bad kumta ter ter la hap ban ai noh kamut ba ki hap ban treikam shuwa ba long MLA, hynrei ki kyrtong kiba don shisha ka jingangnud kin trei tad hadien ba kila long MLA ban pydonkam ïaka bor jong ki.
Lada u kyrtong u ba la pynlut lypa shuwa ka elekshon bad shuwa ban long MLA u tang shu jop u la jah noh bad kane ka dei kaba ngi shait iohi haki constituency bapher bapher khamtam haba jop ki heh spah, namar ba kila pynlut lypa ïaka pisa ba kam dei kaba shu bret ei, ka jingkheiñ ka biang kaei kaba kila ai haka por elekshon, hynrei ki paidbah pat ki ud ba jah ki skhim ki ong bym ioh eiei, hynrei ki klet pat ba kila dep ban ioh shuwa ka elekshon, namar ki hehspah lada ki pynlut 1 hajar ki dei ban iohnong 50 hajar namar ym dei tang ba kin pynioh biang ïa kaba kila dep lut hynrei ban ioh nong ar shah lai shah.
Ngi kum ki paidbah ngi sei ban sngewthuh shai bad husiar lada ngi kwah ioh shuwa ba kin long MLA bad lada ki jop kita kin sa jah 4 snem bad kin sa wan ban mih biang ha u snem ba 5 ban wan bret tyngka biang naka bynta kawei pat ka samoi ban wan, bad kine baroh ka shong haki paidbah ban pynbeit.
Lada ki paidbah ki ong ngin jied shuwa ngin pynjop shuwa sa ai ki skhim sa ïarap ïangi ynda phi la shong shuki kata ka dei ka lynti kaba biang eh lada ki paidbah ki sngewthuh kaei kaba kidei ban leh ban pynlong pat ïaka synshar khaddar kaba khuid ba suba.