Plie u Bah George B Lyngdoh ïa ka Solar Power Energy ka SELCO Foundation ha kyrdem PHC
Baroh ki jaka sumar ha Ri-Bhoi la pynbiang lut da ki Solar Energy
Nongpoh, Nohprah 23: Ka SELCO Foundation haka jingïatreilang bad ka National Health Mission, jong ka sorkar jylla haka sngi Balang kala ioh ban plie paidbah sa kawei ka Solar Energy bala bei pisa da ka SELCO Foundation ka ban pynbiang ïaki jingdonkam jong ka Kyrdem PHC ban pynsuk ïaka rukm treikam jong katei ka jaka sumar khamtam ha kaba ïadei bad ka bording.
Ïa katei ka Solar Energy la plie paidbah da u Bah George B Lyngdoh MLA ka Umroi Constituency kum u kongsan haka jingdonlang ka kong Memorial Tmung DEIC Manager jong ka ophis u DMHO, ka Dr Ruth Marak Medical Officer ka Kyrdem PHC, Bah P Mukhim Rangbah Shnong ka shnong Kyrdem, ka kong Mebariskhem Shangpliang Project Co-ordinator ka SELCO Foundation, ki ASHA, Aganwadi bad kiwei kiwei ki riew rangbah bad ki ophisar naka tnad ka koit ka khiah.
Lyngba katei ka thong jong ka SELCO Foundation ka long shisha ka jingkyrkhu ïakiba bun ki jaka sumar jong ka sorkar haka jylla bad kumba long ha Ri-Bhoi District la dep ban pyndait lut da ki Solar Power haki jaka sumar naduh u PHC, Sub Center, ki jaka pynsyiad ïaki khyllung, ki jaka kha khun da ka jingangnud ban kyntiew ïaka jingshakri haka liang ka koit ka khiah bad katei ka Foundation ka don ruh ka thong ban pynbiang lut da ki sorlar Power ha baroh ki PHC bad Sub Center haka jylla baroh kawei khnang ba ki jaka sumar kin nym thud ka bording ha kaba ïadei bad ka jingshakri bad jingsumar ïaki paidbah.
Haba kren ha katei ka sngi naka liang u Bah George B Lyngdoh MLA ka Umroi u la ai ka jingïaroh ïaka SELCO Foundation kaba la shim ïaka sienjam ban pynbiang lut da ki Light Solar ha baroh ki jaka sumar ha Ri-Bhoi District ryngkat ka thong haka jylla hi baroh kawei kaba long ka jingkyrkhu ïaki jaka sumar khamtam ïaka sorkar ba ki nongtrei ka tnad ka koit ka khiah kim don jingthud ban ai ka jingshakri sha ki paidbah ha kaba ïadei bad ka jingdonkam bording khamtam haki jaka kha khyllung, ryngkat ka jingkitbok ïa katei ka Foundation ba kan dang lah ban trei kham bha ban ai ka jingshakri sha ki paidbah.