Bun ki seng saiñ pyrthei kiba pyrshang ban pharia ïa ki jaidbynriew ka jylla : ong u Conrad

Shillong, Rymphang 15: U Khliehduh ka NPP bad u Myntri Rangbah ka jylla u Conrad K Sangma ha kane ka sngi u la leit ban ïalap elekshon na ka bynta u kyrtong ka seng na Jirang constituency u Bah Sosthenes Sohtun na ka bynta kane ka elekshon sha Khasi Hills Autonomous District Council (KHADC).
Haba kren ha kane ka sngi u khliehduh ka NPP u la ong ba kane ka elekshon kaba mynta ka long kaba kongsan bha. “Bun na ki political party ki pyrshang ban ïalap halor ka communal politic. Ki pyrshang ban phiah ïa ki briew jong ngi. Ka NPP ka dei ka seng kaba ym khang ïa ka jingngeit niam bad kaba la trei na ka bynta ka roi ka san jong ka jylla. Ngi donkam ban ïalong kawei bad ban vote na ka bynta ka NPP khnang ban lah ban ïakhun pyrshah ïa ka jingisih bad ka jingbym shaniah.”
Haba ong ba ka Meghalaya la tip baroh ba ka ieid ïa ka shongsuk shongsaiñ, u la kyntu ïa ki paidbah ban pyrkhat na ka bynta ka lawei jong ka jylla bad ban ïatylli ban vote ïa ka NPP.
“U MLA jong ngi u Bah Sohtun u la leh bun ki kam na ka bynta ban wanrah ki kam pynroi hapoh ka constituency ha kine ki 7 snem ba la dep. Mynta ka la dei ka kynti ba ngin ai ka vote ïa u kum u MDC na ka bynta ka roi ka san jong ka thaiñ bad kumjuh ruh ban pynkhlaiñ ïa ka district council”.
“Ka lyer jong ka NPP ka khlaiñ bha ha ki 5 tylli ki constituency ka Ribhoi. Ki paidbah kane ka thaiñ ki la pyni ïa ka jingshaniah ha ka jingïalam jong ka party bad ngi thikna ba ka result elekshon kan long na ka bynta ka NPP,” u la bynrap.
Haba pynpaw ka jingsngewskhem ba ka party kan ïoh biang ïa ka bor synshar ha KHADC bad JHADC, u heh ka NPP u la ong ba baroh artylli ki executive committee ha kane ka kynti kaba mynta yn sa ïoh ban synshar bad ïalam da ka party.
Haba ïathuh ba ka 39th National Games 2027 yn pynlong ha Meghalaya, u la ong ba kane kan long ka jingsarong ïa ka jylla baroh kawei. “Ngim ju poi pyrkhat ba ka national games kan long ha kane ka jylla. Hynrei mynta ka Indian Olympic Association bad ka sorkar pdeng ka la pyni ïa ka jingshaniah ha kane ka jingïohi jngai jong ngi ban kyntiew ïa ki kam lehkai ha ka jylla”.
U la ong ruh ba ki jingtei haba ïadei bad ki kam ïalehkai yn ym tei tang ha Shillong, Jowai bad Tura hynrei wat sha ki kyndong kynshrot jong ka jylla.
“Katkum ka Meghalaya Sports Policy, ngin ai kam sorkar ïa kiba ïoh medal ha ka national games. Nga kwah ban kyntu ïa ki nongïalehkai ne athlete na ka jylla ba ki dei ban pynkhreh bha bad ban jop bad ïoh khur ïa ki medal ha 2027 National Game bad ban pyrshang katba lah na ka bynta ban ïoh ki kam sorkar,” u la bynrap.