Khyndiat bnai mynshwa, la ïohi, ba ka sorkar jylla, ka la phah ïa ki nos sha Japan, ba kin leit trei sha katei ka Ri kaba shajngai bah bad nangta ha ki khyndiat sngi ba ladep, la ïohi, ba ki samla KSU, ki thaw ïa ka khyrdop ha Ribhoi ban pyrkhing ïa ka leit ka wan, ki briew kiba nabar sha Ri Khasi.
Halor katei ka phang, ka wan ka jingkylli kaba donkam bha, ba ki don bun bah ki samla jong ka Ri Khasi, kiba leit wad kam shabar jylla ne shabar ri ruh kumjuh bad kata ruh, ha ka jingsiew kaba rit bad don na kine kiba leit trei ha ki call centre, kiba leit ha ki hotel, ha ki dukan heh, kiba trei nos bad wat kiba leit shong leit sah bad kiwei pat bad ha kajuh ka por, ka don sa kawei pat ka phang, ka long ba kine ki briew kiba nabar, ki ïai wan rung man ka khyllipmat sha ka jylla Meghalaya bad kitei ki wan ban trei surok, ban trei dewïong, ban trei karkhana, trei misteri, trei ha ki tnat telephone, ha hospital, dukan bad kiwei de ki kam rit kam ria.
Ka jingkylli, namarkata ka long, la ki samla ka jylla kim lah mo ban trei ïa kine ki kam lane lehse ba ki dei kiba jaituh, ki bym don sap, ki bym trei shitom, kiba kwah bainong heh, namar ba ki leit wad kam sha kylleng ka India, katba kiwei pat kiba nabar, ki wan trei sha ki jaka Khasi Jaiñtia?
Kane ka dei ka mat kaba kongsan, ba ka sorkar jylla, lada dei ïa ka health department, ka tnat PWD, PHE, Industry, Food and Civil Supply department bad kiwei, ba kin shim khia ïa kane ka mat bad kata ka long, ba kin thaw ïa kawei ka tnat kaba hikai ïa ki samla ka jylla, ba kin lah ban trei ïa ki kam bapher bapher, ba kin nang ne donsap ha ki laiñ bapher bapher bad katei ka kynthup, ba kin nang ban pyndonkam ïa ki mashin tih surok, ki mashin jong ki mobile company, nangta ha ki kam shna ïing, ki kam shet jingbam, ki kam karkhana, ki kam pynkhreh ïa ki jingïalang kiba heh bad wat ïa ka rep ka riang ruh bad ïa kitei ki laiñ, ka donkam, ïa ka sorkar jylla, ba kan ïateh lok bad ki karkhana dewbilat bapher, ki kontraktor shna ïing kiba heh ba heh, kiba trei surok, kiba trei hospital, ki press shon kot bad lada ka don katei ka jingmut ha ka sorkar jylla, kumta kiba bun ki samla Khasi Jaiñtia, kin nym jin da la iehnoh ïa la ka ïing ka sem, ban leit wad bylla sha ri nongwei.
Ka donkam kyrkieh ïa ka sorkar jylla, ba kan pynkhlaiñ bor ïa ka Industries Department bad kumjuh ïa kiwei de ki tnat, ba kin saiñdur ïa ka lashai jong ki samla, ba kan nym donkam shuh ba kin wan ki briew kiba nabar sha ka ri Khasi Jaiñtia bad ba ki samla Khasi Jaiñtia ruh, kin nym leit shabar jylla, na bynta i kam iba rit ba ria; hynrei na ka daw jong ka jingduk jingkyrduh ki don shibun kiba la hap ban mih na la Ïing bad leit wad kam thohmut thohmat ban pyndap, ïa la ka jong ka kpoh bad nangta ka don ruh sa kawei ka jinglong bad kata ka dei ka jingkwah suk palat bad ka dei kata, kaba ki business man kim sngew tynnad ban ai kam ïa ki samla Khasi, na ka dawa bai nong heh, katba ka jingtrei pat kaba suk.
Kane lehse la lah ban ïohi ruh ba bun na ki briew ha Sor Shillong kiba wad nongtrei ïing ha kaba kane lei ka jait kam ba bun kim kwah shuh ruh wat ban peit kumta sa katno lei kiba kwah ban trei.
Lah ban ong ka kam shong bylla ha Ïing briew kam da dei than eh kaba bun kam, lait noh na kito ki longïing kiba ju thlia ïa ki nongtrei ïing ha kaba wat ka thiah ka dem ruh kam biang shuh, hynrei don pat ki ïing ki bym ju thlia palat ïa kiba trei ïing. Kidon pat kiba kwah trei ïing kiba kwah da ka dor kaba heh katba ka kam ka long kaba rit ne duna.
Kumba la ju ong da mano re mano, ki Khasi kidei kiba kwah da ka kam kaba shu shong bad ïa kane la ïohi shisha na ka jingkynrei kiba kwah ban shongdie jingdie ha manla ki jaka kaba long pynban ka jingpyndik ïa kiba ïaid ba ïeng bad kumta ter ter, la donkam shisha ïa ki briew sorkar ban leh eiei halor kane ka jingeh.
