Shillong, Naitung 14: Ka Ri-Bhoi District ka la synshar hi dalade ïa ka lympung ïalehkai phutbol jong ka State Level Subroto Cup 2024 hadien ba baroh lai tylli ki skul ba mihkhmat na kane ka District ki la khur jingjop ha ka jingïakhun final ban rah syndon ïa ka namlahduh ha ka Sngi Saitjaiñ ha SSA Ground, Polo.
Ha ka kyrdan ïalehkai Under-15 jong ki khynnah shynrang ka Nongjri Presbyterian Secondary School ka la ïohrah ïa ka namlahduh, nangta ka ka Christian Higher Secondary School ha ka kyrdan Under-17 jong ki kynthei bad la khylliap ïa kane ka lympung State Level da ka Myngken Christian Higher Secondary School kaba la rah ha ka kyrdan Under-17 jong ki Shynrang.
Baroh lai tylli ki skul ki ïakynduh pyrshah bad ki skul na ki district bapher bapher ha ka jingïakhun ïa ka final, ha kaba la lamkhmat ïa ka Ri-Bhoi ban poi sha ka burom lahduh da ka Nongjri Presbyterian, kaba la pynliem noh ïa ka Government Boys Higher Secondary School (Tura) jong ka West Garo Hills da 4-1 kol.
Ha ka jingïakhun, dei ka Government Boys HSS (West Garo Hills) kaba la ïoh lamkhmat nyngkong ïa ka jingïalehkai lyngba u Thang Guo Lun Vaiphei tang hadien 1 minit ba la ïaid ka por, hynrei ka Nongjri Presbyterian ka la ïohlad ban pynïakhaid lyngba ka penalty ha ka minit ba 11 na u Dabetskhem Rympei.
Nangta ka Nongjri Presbyterian ka la ïoh ban pynbud sa ïa lai tylli ki kol na u Chanjip Chetri (13 minit) bad na u Prosperwell Ryntong (18, 47 minit) ban pynthikna ïa ka namjop.
Ha ka kyrdan ïalehkai Under-17 jong ki kynthei, ka skul Christian HSS ka la pynjemkhnap ïa ka Kyrshai Government LP & UP School kaba na West Khasi Hills haduh 4 kol. ïa kine ki kol la thep da ka Darika Rani (5 minit), ka Rimika Khongkai ka la ïoh thep ar kol (20, 51 minit) bad khadduh na ka Pynibha Rangthaluh (25 minit).
Ha ka jingïakhun ba khadduh (kyrdan Under-17 Shynrang), la sakhi ïa ka Myngken Christian kaba la pynliem noh da 3-1 kol ïa ka North Liberty Higher Secondary School kaba na West Jaintia Hills.
Ka Myngken Christian ka la synshar ïa ka jingïalehkai hadien ba ïoh lamkhmat da 2-0 kol, kiba la wan na u Mebankhraw Nongrum (21 minit) bad u Banganson Nongpalang (42 minit). Ka North Liberty Higher Secondary School ka la ïoh mynsiem shipor hadien ba u Jimal Rasmeet u la pynphai ïa ka shi kol ha ka minit ba 56 hynrei ka jingïakhun ka la pjah hadien ba u Banganson u la pynkhih ïa ka kol kaba ar (65 minit) ïalade kaba la pynthikna ïa ka Myngken Christian ban khur ïa ka jingjop da 3-1kol.
Kiba la ïadon ryngkatlang ha kane ka sngi ki kynthup ïa ka Secretary jong ka tnat Sports ka Kong Isawanda Laloo, nangta u Director jong ka tnat Sports – DD Shira, u Working President ka Meghalaya State Olympic Association- Bah John F Kharshiing, Hamletson Dohling- President ka Meghalaya Football Association, ki dkhot nongkitkam ka Shillong Sports Association lem bad kiwei kiwei.
Nalor ki lahduh la ïoh ruh ban sam ïa ki khusnam sha ki player ba kynsai ha baroh lai tylli ki kyrdan ïalehkai. Ha ka kyrdan Under-15 Shynrang: ïa ka nam ‘Best Goalkeeper’ la khur da u Thrisilbirth A Sangma jong ka Govt Boys HSS na Tura (WGH), katba ïa ka khusnam ‘Best Player’ ka la leit sha u Prosperwell Ryntong jong ka Nongjri Presbyterian SS (Ri-Bhoi).
Ha ka kyrdan Under-17 ki kynthei: ïa ka nam ‘Best Goalkeeper’ la khur da ka Ibashongkun Shylla, katba ‘Best Player’ ka la leit sha i Daiamon Marboh, ha kaba baroh arngut ki dei jong ka Christian HSS (Ri-Bhoi).
Ha ka kyrdan ïalehkai Under-17 Shynrang: ‘Best Goalkeeper’ la khur da u Wanpli Malang, katba ‘Best Player’ ka la leit sha u Banplibok Khongjoh, baroh arngut ki dei jong ka Myngken Christian HSS (Ri-Bhoi).
Kumban shu pynkynmaw, ïa kane ka lympung ba la pynlong da ka tnat Sports jong ka Sorkar Jylla, ka la sdang naduh ka Sngi Hat Majai (09 tarik Naitung, 2024), ha kaba ka jingïakhun ka long hapdeng ki lahduh na ki 12 tylli ki district hapoh Meghalaya kiba ïaknieh ban ïohm mihkhmat ïa ka Jylla sha ka National-level Subroto Cup 2024 ka ban sa long shen.
