Shillong, Lber 26: U Myntri Rangbah ka jylla u Conrad K Sangma u la pynpaw ba na ka liang ka sorkar jylla ka dang artatien ba ka sorkar pdeng kan bei tyngka halor ka jingtyrwa ban tei ïa ka kad lieng suiñ kaba thymmai ha ka jylla.
“Ban tei ïa ka kad lieng suiñ kaba thymmai ka donkam ka jaka kaba ïar bha bad kaba mut ka jingsiew bai lutksan kaba heh bha kaba lah ban poi da ki spah spah klur. Nangta donkam ban bei tyngka ruh na bynta ban tei ïa kad lieng suiñ bad ngim pat thikna la ka sorkar pdeng kan bei tyngka ne em bad ha kano ka dur kan ïarap ruh ngim pat thikna bad na ka liang jong ngi ngi dang eksamin ïa kane ka jingtyrwa kaba mih halor ban tei da ka kad lieng suiñ kaba thymmai,” ong u Myntri Rangbah.
U la pynpaw ruh ba ban ïa ka jingshna ïa ka kad lieng suiñ thymmai kan dang kham suk ban wad ïa ki lad ki lynti ban kham pynbha ïa ka jaka hiar bad jaka tyllun ki lieng suiñ ka kad lieng suiñ ba la don Lupa ha Umroi khnang ba ki lieng suiñ kiba kham heh kin lah ban hiar ha kane ka kad lieg suiñ,” u la ong.
U la ong ba na ka liang ka sorkar ka dang eksamin ba kano na kine kaban kham biang namar ban tei da ka kad lieng suiñ kiba thymmai ka jinglut ka long kaba heh haduh katta katta bad lada dang lah ban kham pynheh ïa ka kad lieng suiñ ba la don lupa ka sorkar kan sa shim ïa ka rai napdeng kine ki ar tylli ki lad kiba don.
