Shillong, Jymmang 23 : Ka jingtwa khyndew khah khah ha kito ki jaka ba dang pyntrei ïa ka surok bah Shillong – Dawki ka la pynlong ïa ka FKJGP Pynursla ban dawa ba dei ban buh da ki kor khat khyndew ne puh shilum ha kito ki jaka ba don jingma kum ka jingpynkhreh ban lait na kino kino ki jingjulor ne ki jingjïa bym sngewtynnad.
Ka seng ha ka shithi sha u General Manager jong ka NHIDCL ka jingtwa khyndew dang shen ha ki jaka ba shna ïa katei ka surok bah ka la wanrah ïa ka jingeh bad ka jingjynjar kaba harukom ïa ki nongleit nongwan.
“Ka kompeni kadei ban khot trei da ki briew kiba la don jingtbit khamtam eh da kiba dei na katei ka thaiñ hi, ha ka por ba pynkhuid ïa ka khyndew ba twa, dei ban ker bha da ki maw heh khnang ba kan ym tuid kylla pat sha ka surok ba ïaid kali, dei ruh ban pynap lypa da ki puh shilum ha kito ki jaka ba don ka jingma ba ka lah ban don ka jingtwa khnang ban lah pynkhuid kloi bad ba kan ym ktah ïa ka leit ka wan,” ong ka seng ha ka dorkhas ba la soi da u Information Secretary, Bah Evanfield Khonglam.
Ka seng ka dawa ruh ba dei ban buh da ki nongpahara ha kito ki jaka ba don ka jingtwa la kumno kumno 24 kynta khnang ba ki paidbah kin tip ba ka don kum katei ka jingjia.
Nalorkata, la dawa ruh ba ka kompeni ba pyntrei ïa katei ka surok kadei ban pyntip mardor sha ki bor sorkar lane ha ki nongsynshar shnong jong ka thaiñ Pynursla haba don kum kitei ki jingjia khnang ban dup lah ban shim ïa ki sienjam kiba donkam.
