Buddien ka KSU halor ka dorkhas ban wanrah noh ïa ka tnat pulit ban pyniaid kali ha EJHD

Khliehriat nohprah 10: Ki nongïalam bad ki dkhot jong ka Khasi Students Union Khliehriat Town Unit bad Ladrymbai Unit, myn ha ka 8 tarik mynta u bnai ki la iakynduh ïa u Additional Superintendent of Police East Jaiñtia Hills District, u bah Banraplang Jyrwa bad kane ka long kum ka jingbudien ïa ka dorkhas bad ka seng ka la dep buh halor ka jingdawa ba donkam ban don noh da ka tnat pulit ba pura ka ban pyniaid kali ha Khliehriat bad ha Ladrymbai, khnnag ban dup lah ban tehlakam ïa ka jingdheng kali kaba ju jia khah khah.
Ïa ka dorkhas ka seng ka la dep ban aiti ha u Symbud myntri rangbah ka jylla, u bah Prestone Tyngsong, dang ha kine ki khyndiat bnai ba la leit, ha kaba ka seng ka la kyntu bad dawa na u symbud myntri rangbah ban wanrah noh ïa ka tnat pulit lane ka traffic branch kaba pura ban pyniaid kali ha sor bah Khliehriat bad ha Ladrymbai, halor kane ka dorkhas ka seng ka la buddien sa na u Additional Superintendent of Police jong ka district.
Ka seng ka la pynpaw ka jingsngew khia ba halor kane ka phang kaba dei ka jingdawa na ka seng, na ka liang ka sorkar kam pat shym la leh eiei ruh.
Kum ka jingai jingmut kaba na ka liang ka seng, la ong ba kan bha ban pyniaid noh na ka surok Ladrymbai Bypass ïa kito ki trok kiba thylli, kata ha ka por myn sngi, khnang ban dup lah ban tehlakam ïa ka jingdheng kali ha Ladrymbai bad ha Khliehriat, namar ka jingdheng kali kaba ju jia khah ka ktah ïa ki paidbah ba leit ba wan, ïa ki khynnah skul, ïa ki kali pynlip ding bad kumjuh ruh ïa ki kali kit nongpang., wat hapdeng kine ki jingai jingmut, ka seng ka ïai ban jur ba ka donkam hi ban don da ka tnat pulit ban pyniaid ïa ki kali, ka traffic branch ka ban treikam pura hapoh ka district.`