Mawkyrwat, Nohprah 10: Ka Khasi Students Union (KSU) jong ka Warsanlyngdoh Circle, South West Khasi Hills District ha ryngkat bad ki nongshong Shnong jong ka thaiñ ki la pynpaw ka jingsngewbynñiaw halor ka jingpynslem ka sorkar ïa ka jingkhot tender biang ïa ka surok na Pyndenumjaraiñ haduh Mawphanrang.
Kane ka jingleit jong ka seng ka dei ha kine ki taïew ba la dep kata ha ka 7 tarik u Nohprah, 2023 kaba hapoh ka jingïalam u bah Donbor Marshra, President KSU Warsanlyngdoh Circle ha ryngkat da ka jingïadonlang u bah Onder Marthong, u riew Rangbah jong ka Shnong Pyndenumjaraiñ lem bad ki dkhot jong ka KSU.
U bah Donbor Marshra, President KSU Warsanlyngdoh Circle haba ai jingkren ha kane ka sngi u la ong ba ha ka jingshisha kane ka surok ka dei naduh u snem 2017-18 ba la pyntrei lyngba ka scheme PMGSY hynrei kim lah ban tip na kaei ka daw la pynslem ïa ka jingpyntrei ïa kane ka surok.
“Dei tad hadien ba ka seng ka la leit wad jingtip bad la lap ba u contractor ba pyntrei ïa kane ka surok u la sangeh (Surrender) noh ban pyntrei ïa kane ka surok”, ong u bah Donbor.
Namarkata, ka seng ha kine ki bnai ba la dep ka la leit ïa kynduh ïa u Chief Engineering jong ka tnad PWD (R) bad ruh ïa u Minister In-charge ka PWD (R), u bah Prestone Tyngsong bad ma ki ruh ki la kular ban khot tender biang ïa kane ka surok ha kine ki bnai ba la dep hynrei haduh mynta ki pat leh ei ei ïa kane ka surok.
