Shillong, Naitung 30 : Ka Seng Samla Mawlai Pyllun ha ka sngi Nyngkong hapoh ka jingïalam jong u President Bah Samuel Biam ryngkat kiwei ki nongïalam ki la leit ban kynduh biang ïa u Additional Chief Engineer ka PHE Department Bah BL Lawai ban buddien ha kaba ïadei bad ka jingsam um ha ki ïing ka ba ju sam tang 2 shi taiew ïa ka Mawlai.
“Ka Seng kam hun ïa ka jubab halor ka shithi kaba ki la phah sha ka Seng na ka bynta ka jingmyntoi ki Nong Mawlai, kumta ka la leit ban kyntu ïa ki ba kin pynurlong ïa ka jingdawa,” ong ka kyrwoh na ka Seng.
La ïathuh ba ki mat kiba ka Seng ka buh ha khmat ïa ka jingbym hun ïa ka jubab, ka long ba ka PHE ( GSWSS) kan buh ïa ka sngi ban leit jurip lang ban thep ïa ki pipe thymmai na ka bynta ka Mawlai katkum ka jingbunpaid ki nongshong shnong bad jingheh palat ka Shnong Mawlai.
Shuh shuh la ïathuh ba ka Seng ka kyntu ïa ka tnad PHE ba kan ai um ïa ka Mawlai ( ha ïing) 6 sien shi taiew namar kumba long haduh mynta ïoh um tang 2 sien shi taiew katba ki shnong kiba dei shabar ka Mawlai ki ïoh um 2 sien shi sngi kata ruh baroh shi taiew.
Kawei pat ba ka seng ka dawa ka long ba kan ïoh thik marwei u pipeline ban pynbiang um ïa ka Mawlai. Ka seng ka kyntu ïa ka tnad ban pynbiang ïa ka jing poi bun ka um khnang ban lah ai thymmai shuh ïa bun bah ki longïing kiba la aplai la slem bah bad ka rukom sam um kaba long ryntih ïa baroh khlem da niew shiliang ïano ïano.
Ka kyrwoh na u President ka ong ba na ka liang u Add Chief Engineer bad ki officer ka tnad ki la kular ban shimkhia ïa ka jingdonkam ki nong Mawlai bad na ka liang ka Seng ka khmih lynti ban urlong noh shen. Shuh shuh la ong ba ka Seng ka kyrmen skhem ba ki nong Mawlai kiba donkam um man ka sngi kin kyrshan lang ïa kane ka mat kaba kongsan na bynta jong ki.
