Bthah u Bah Prestone ïa ki Pulit ban pynjur ka jingpahara ha ka nongbah Shillong

Shillong Nailur 17 : U Symbud Myntri Rangbah ka Meghalaya, Bah Prestone Tynsong ha ka sngi Palei u la ong ba ka sorkar ka la bthah ïa ka tnad Pulit ban pynkhlaiñ shuh shuh ïa ki bor pahara ha ka nongbah, khamtam hadien bun ki jingjia kiba la jia ha kine ki khyndiat sngi.
Haba kren bad ki lad pathai khubor, u Symbud Myntri Rangbah ba peit ruh ïa ka tnad Kampohiing u la ong ba ka jingtohkit halor ka jingwiang ding ka dei ka kam jong ki Pulit, bad halor kane u la iathuh ba u la dep ban bthah ïa ka Director General of Police (DGP) ban leh kham tyngeh ha ka jingïakhun pyrshah ïa ki kam runar.
“Ka dei ka kam kaba ki pulit kin peit. Nga la dep bthah ïa DGP ban shimkhia bha ïa kane ka kam. Ym tang katta, nga la bthah ruh ïa ki ophis bad ki bor ba dei peit ba kin pynkhlaiñ shuh shuh ïa ka jingïada,” u la ong.
U Bah Prestone u la ong ruh ba ka sorkar ka kwah ban pynkhlaiñ ïa ka jingdon jong ki CCTV ha ki jaka kiba donkam, ryngkat bad ka jingpynkhlaiñ ïa ka jingïaid pahara jong ki pulit hapoh nongbah.
“Lada donkam, ngi hap ban pynbun ïa ki CCTV ha ki jaka kiba donkam. Ha kajuh ka por, ki pulit ruh ki hap ban pynkhlaiñ ïa ka jingïaid pahara hapoh nongbah,” u la ong.
Halor ka jingkylli, u Symbud Myntri Rangbah u la ong ba ym lah ban ong lano ki kam runar kin kut namar ki jingjïa kum kine ki lah ban jia ha kano kano ka por.
“Ngim lah ban ong lano yn kut. Phi tip, ki kam runar ki lah ban jia man ka por,” u la ong.
U la pynpaw ruh ba na ka liang jong ka sorkar kan shim ïa baroh ki sienjam kiba lah ban leh ban ïada ïa ki paidbah bad ban pynthikna ba ka aiñ kan treikam.
“Na ka liang jong ka sorkar, ngi pynthikna ïa ki paidbah ba ngin leh ïa baroh kaba ngi lah ban leh. Ngim yn shah ïa kine ki kam runar ba kin jia man ka sngi,” u la ong.
U la phah ruh ïa ka jingmaham sha kito kiba donkti ha ki kam runar ba kin sangeh noh, da kaba ong, “Ka aiñ kan bud ïa ki bad ka hok kan treikam”.