Bthah u ADC ïa ki nongdie dukan ha 7 mer ban pynbiang dulir, pyrshah ka FKJGP

Shillong, Risaw, 20: Ki ophisar jong ka Mylliem C&RD Block ryngkat lang bad ki Engineer ka tnat PWD ha ka sngi Palei ki la sorjamin ïa ki dukan kiba don hajan ka kynroh ki shipai suiñ ka Eastern Air Command ha ka 7 Mer Upper Shillong.
Kane ka jingsorjamin jong kine ki ophisar ka long hadien ba ka Ophis jong u Additional Deputy Commissioner ka East Khasi Hills u Bah A.L Myrthong, ha ka 18 tarik ka la phah da ka shithi sha baroh ki dukan kiba don hajan ka kynroh ki shipai Suiñ ha kaba la pyntip ba kan don ka jingjurip ïa ki dukan ryngkat bad ki shipai Indian Air Force bad ki bor synshar shnong ha kane ka sngi.
U Addl Deputy Commissioner u la bthah ïa ki nongshong dukan ba ki dei ban don ha ki dukan ha ka por ba wan jurip bad ba ki dei ruh ban pynbiang ïa ki kot ki sla kiba ïadei bad ka jaka shong die jingdie ha ryngkat ka No Objection Certificate (NoC) nalor kiwei kiwei ki kot ki sla khnang ba donkam.
Ki dkhot ka Federation of Khasi Jaintia & Garo People (FKJGP), Upper Shillong Circle tang shu ïoh jingtip halor kane ki la leit mar mar sha kane ka jaka ban pynpaw ïa ka jingpyrshah kaba jur halor ka jingthmu jong ki bor synshar District ban pan ïa ka No Objection Certificate (NoC) na ki nongshong dukan trai jylla kiba ju im kamai jakpoh harud ka surok 7mer, Upper Shillong.
Ka Seng hapoh ka jingïalam jong u President u Bah Kitboklang Nongphlang uba dei ruh u Vice President jong ka FKJGP Sengkmie, ka la leit ban tuklar ïa ka jingleit sorjamin jong ki bor synshar District bad ki shipai Indian Air Force ïa kine ki dukan kane ka sngi.
“Ngi pyrshah jur ïa kane ka jingbthah u ADC. Ngim sngew don nongrim ba kane ka ophis kan pan ïa ki NoC ne ki kot ki sla na ki trai shnong kiba shong dukan ban kamai jakpoh ha kane ka jaka” ong u Bah Kitboklang Nongphlang.
U la ong ba ka Seng ka kren da kaba shai ba ki bor sorkar ne ki bor shipai Indian Air Force ba kim dei ban mushlia ïa ki trai ri trai muluk kiba kamai jakpoh ha la ka jong ka ri hynrei lym kumta ka seng ka long kaba la khreh ban shim da kiwei pat ki sienjam.
U Bah Kitbok u la ong ba ka seng ka dawa ïa ka Mylliem C&RD Block bad ïa ka tnad PWD ba kim dei ban shim rai bakla halor kane ka jingjurip khamtam eh ban kyndang ïa ki trai ri trai muluk kiba shong dukan ban kamai jakpoh harud ka surok 7mer mynta la bun bun snem.
“Lada ka ophis ka Deputy Commisioner lane ka tnat PWD ki phah kyndang ïa kine ki dukan, ki dei ruh ban kyndang lut ïa baroh ki dukan jong ki bar jylla kiba don harud ka surok PWD naduh Rilbong, Mahadevkhola bad sha kiwei kiwei ki jaka ruh kumjuh ym tang ha ka thaiñ Upper Shillong” ong u nongïalam ka FKGJP.