Phuh samrkhie ka longïing ha Mylliem Rngi ban pynshna ïing u MLA

Shillong, Risaw 20 : U MLA ka Mylliem ba dei ruh u Myntri ka tnad C&RD ka sorkar jylla, Bah Hamlet Dohling ha ka 14tarik mynta u bnai u la aiti ai ka ïing kaba u la pynshna thymmai ha ka shnong Mylliem Rngi.
Ïa katei ka ïing, u MLA u la ait ha ryngkat ka jingdonlang u Assistant Parish Priest ka St. Paul Parish, Fr. Jenis Nongneng, nangta u Babu Katekist M Kharpuri, Rangbah Balang S Kharkongor, Tymmen Basan P Kurkalang, ki nongïalam shnong, bad ki nongïalam jong ka Mylliem Them Welfare Organisation.
Na ka liang ki bahaïing ki ïathuh ba kum ka ïing ki la kynduh ïa ka jingeh kaba khraw naduh ba u kpa ka ïing u la khlad noh ha u snem 2016. La ïathuh ba dei ha u snem 2018 pat ba la pluh sa ka ïing bad kumta ki la im khlem ïing khlem sem.
Kum ka kmie, nalor ka jingduk ka la hap ruh ban pynbiang ïa ka bam ka dih jong ki san ngut ki khun da kaba bylla sngi nalor ba ka hap ban pyndap ïa ki jingdonkam kiba man ka sngi. Ha ryngkat ka durkhmat kaba phuh samrkhie ki la pynpaw ïa ka jingsngewnguh kaba khraw ïa u nongmihkhmat uba la ïohi lem ïa ka jingeh ba kum ka ïing ki kynduh.