Shillong, Jymmang 13: U Symbud Myntri Rangbah ka Jylla Bah Prestone Tynsong hynne ka sngi thohdieng ula ong ba ka Sorkar kala bthah ïa ka National Highways & Infrastructure Development Corporation (NHIDCL) ba kan bteng beit ïa ka jingtrei jong ka surok Shillong-Dawki ba 95 km wat hapdeng ka jingwan kloi jong ka lyiur.
“Ngi la dep bthah ïa ka NHIDCL ban bteng beit ïa ka jingtrei jong kane ka surok namar ngi kwah ban ïohi ba kane ka project kan dei kloi noh kat kaba lah. Namar kata, kat kaba long ban trei bad kat ki jaka ba ibit ban trei la ka dei wat ha ka por slap ruh ki lah ban trei hynrei ki donkam pat ban hap husiar bha ban lait na kino kino ki jingjia” ong u Bah Prestone haba ïakren bad ki nongthoh khubor.
Hynrei ula pynpaw pat ïa ka jingartatien ba kane ka project kan dep hapoh ka por kaba buh kata ha u snem 2024.
“Artatien bha naba ha Meghalaya, ka por treikam ka long tang hynriew lane hynniew bnai bad saw-san bnai ka dei ka lyiur. Kane kan ktah beit ïa ka jingtreikam naba ha ka por lyiur, ki nongtrei ki lah ban nym ïoh trei na ka jing hap u slap” ula ong.
U Bah Prestone ula ong “Nga la bthah ïa u Secretary ka PWD, ïa u Chief Engineer (NH) ban buddien bad pynthi kna ba ka kam ka dei ban dep noh kloi kat kaba lah”.
U Symbud Myntri Rangbah u pyntip ruh ba bun ki kali hynne ka sngi kila sahkut ha kane ka surok namar ka jing twa khyndew ha Riat Rngain bad tang hapoh arkynta, ki Engineer, u SDO bad ki Contractor kila leit ban pynkhuid noh ïa kane ka khyndew.
“Ngi la bthah ïa ka NHIDCL ba kan buh beit ïa ki Engineer ha ka jaka trei khnang ba lada don kano kano ka jing twa khyndew, ki lah ban leit pynkhuid kham kloi kat kaba lah” ula ong.
Haba pynpaw ba ka jingkylli ban sangeh ïa ka kam kam mih satia, u Bah Prestone ula ong ‘Lada ngi sangeh mynta ruh lane ngim sangeh, ki jaka ba la dep tih ïa u lum ka lah ban don ka jingtwa khyndew. Haba jur hi u slap, kum kine ki jingjia kin jia beit”.
Halor ka jingshlei um ha surok Shillong-Guwahati, u Symbud Myntri Rangbah ula ong ba ka Sorkar kala ïakren bad ka National Highway Authority of India (NHAI) ba kan leh eiei noh halor kane ka kam.
“La bunsien u MLA ka Nongpoh u ju kren ïa ka jingshlei um ka surok ha Nongpoh hynrei mynta ka jingshlei um kala kham duna naba ka NHAI kala dep shna ïa ki katto katne ki bynta jong ki culvert ba pynïaid lynti ïa ka um sha ki jaka bala ithuh ne buh kyrpang” ula pyntip.
