Bthah ka ïing bishar HC ban pyntreikam ïa ka penshon skhim ha baroh ki skul bad College Deficit
Shillong, Naiwieng 6 : Ka ïing bishar High Court (HC) ha ka sngi Ba-ar, ka la hukum ïa ka Sorkar Jylla ban pynthikna ba ka pension scheme ba thymmai ïa ki skul/college deficit ka dei ban treikam lang ïa baroh ki nongtrei, kiba dang rung kam hadien ka 1 tarik Iaiong, 2010.
Ha ka hukum ba pynmih halor ka mukotduma bala mudui da ka Meghalaya College Teachers Association (MCTA), ka ïing bishar kala ong “Namar kane ka kam, ngi bthah ïa ka SorkarJylla bad ka State Bank of India ban pyndep noh ïa ka Memorandum of Understanding hapoh ka 30 tarik Naiwieng, 2024 bad ban pynbna ïa ka skhim kaba ïahap ha ka gazette jong ka Sokar hapoh ka 15 tarik Nohprah, 2024, kaba kdup ïa baroh ki nongtrei kiba rung kam shuwa ka 1 tarik Iaiong, 2010. Ka jingpyntreikam ïa ka pension scheme ba thymmai na ka bynta ki nongtrei, kiba rungkam hadien ka 1 tarik Iaiong, 2010 ruh ka dei ban dang bteng”.
Kane ka mukotduma ka dei halor ka Centralised Provident Fund Scheme jong ka Sorkar Jylla ïa ki skul deficit bad ki college ha Meghalaya.
Ka shithi na ka Tnad Education ba 23 tarik Risaw, 2024, sha u Advocate General ka pyntip ba dei ban pyntreikam noh ïa ka Centralised Provident Account ïa kito ki nongtrei kiba rungkam shuwa ka 1 tarik Iaiong, 2010.
Ha ka shithi ba 30 tarik Nailur, 2024, ka Sorkar kala bthah ïa baroh ki nongtrei jong ki skul bad ki college kiba hap hapoh ka grant-in-aid scheme ba kin phah ïa ka pisa bala pyllang ha ka Contributory Provident Fund sha ka Centralised Provident Fund Account “The Meghalaya Non-Government School and College Central Pension and Provident Fund” bad ka State Bank of India , na ka bynta kine ki nongtrei.
Hynrei ha ka paragraph 2 jong kane ka shithi, la ong pat ba ka Sorkar Jylla kala ïasoi ia ka Memorandum of Understanding bad ka State Bank of India ha ka 22 tarik Risaw, 2024 ban pyntreikam ïa ka pension scheme ba thymmai ïa kito ki nongtrei kiba rung kam ha lane hadien ka 1 tarik Iaiong, 2010.
Ka jingpyntreikam ïa kane ka pension scheme ba thymmai ka dang don ha ka jingpynkhreh.