Bthah ka HYC ïa ki dkhot ka East Jaiñtia Hills ban ïakhun pyrshah ïa u drok bad ka bamsap

Khliehriat, Nailur, 08: Ha ka jingialang ba la pynlong hynnin ka sngi saitjaiñ ha Community Hall Ladrymbai Datsimpeiñ, u nongialam, uba dei u President jong ka Hynñiewtrep Youth Council (HYC) Seng Kmie, u bah Roy Kupar Synrem u la pynskhem ïa ki nongialam bad ki dkhot jong ka HYC East Jaiñtia Hills District, la synran lang ruh da u General Secretary jong ka seng, u bah Isack Basaiawmoit lem bad ki dkhot.
Haba kren ha ka jingïalang u bah Roy Kupar Synrem u la pynpaw ka jingsngew kmen ba la ioh ban seng ïa ka shnat treikam jong ka seng ha East Jaiñtia Hills District bad u la bynshet ar tylli ki kam ha ki dkhot bad nongialam ka seng kiba na East Jaiñtia Hills District, kata ka long ban ïakhun pyrshah ïa u drok bad ïakhun pyrshah ïa ka bamsap bampong kumba ka seng kmie ka la pruid dak bad ong ruh ba ma ki kum ki nongialam kin sa btin lynti, namar kumba ka seng kmie ka trei shitom ka seng ka kwah bad angnud ba ki nongialam bad ki dkhot kiba na East Jaintia Hills District ruh kin bud ban iakhun pyrshah ïa ki mat kiba ktah ïa ka ri bad ka jaitbynriew
Haba kren sha ki nongïalam bad ki dkhot kiba dang shu dep pynsmai, u Bah Synrem u la ong “nangne shakhmat ngin sa nang ïakren ngin sa nang ïa phylliew jingmut ïa ki mat bapher bapher kiba ktah ïa kane ka dong ka thaiñ bad khamtam eh kito ki mat kiba ktah ïa ka ri bad ka jaitbynriew jong ngi, ngi don ryngkat bad phi ban pyni ha phi ïa kita ki lynti kiba phi dei ban ïaid ha kaba ïadei bad kane ka thma pyrshah ïa u drok bad pyrshah ïa ki jingthombor ïa ka ri bad ka jaitbynriew kiba pynlong ïa ki khun ka jaitbynriew ban ngop ha kine ki jingdih buaid, kaba ar pat nga kwah ban kyntu ba kum ka seng hi baroh kawei ngi hap ban ïakhun ïa ka bamsap bam pong kaba la sdang ban rung haman la ki hsnong haman la ki dong ha man la ki thaiñ jong ka ri baieid jong ngi, namar ka bamsap ka dei kawei ka jingpang kaba lah ban bamduh ïa ngi kum ka jaitbynriew bad ruh lyngba ka bamsap ka wanrah ïa ka jing kiew dor ki mar ki mata bad kane ka ktah ïa ki longïing longsem jong ngi khamtam kito ki kum shiliang ki sem shiliang, kumta ka kamram jong ka seng bad kumjuh ruh nangne na East Jaiñtia Hills District ka long ban peit ïa kane ka bynta ba ka bamsap bampong kam dei ban don ha ka imlang ka sahlang jong ngi bad kumno ban leh ne ban ïakhun ïa kata ka long ba ngi kum ki nongialam ngi don ban btin lynti ïa phi lada ngi ialam ïa phi, kumba ngi la shim ïa ki kyntien smai ban shakri, ban treihok na ka bynta ka ri bad ka jaitbynriew, nga kyntu ïa phi ha kum kane ka por bad phi dei ban ïai bat ïa ki kyntien smai kyntien kular ki jong phi ba phi la shim ha kane ka sngi, shisha ban rung sha ka seng ne sha kano kano ka sengbhalang kam long kaba suk, bunsien ngi sngewthuh bakla ba ka jingrung sha ka seng ka lah ban ai bor ban leh ïa ki kam ba bun jait hynrei ngan ong ha phi ba haba rung sha ka seng hi ka dei ban shakri ïa la ka ri bad kata ka dei ka ktien phira kaba ngi ju buh”
U Principal jong ka Jaiñtia Eastern College Khliehriat, u Dr P.Nongtdu uba la ïa don lang bad ai jingkren ha katei ka jingialang ha Ladrymbai, u la ong ba kiba bun bah ki briew ki kwah ban ai jingkyrshan ïa ka Hynñiew-trep Youth Council hynrei kim sngewthuh bad kim tip pat kum ban kyrshan, halor kane u Dr Nongtdu u la kyntu ïa ki nongïalam ka HYC ba kin sngewbha ban pynshai lem sha ki paidbah lyngba ki bor pynïaid shnong kum ki Dorbar Shnong bad kum ka jingai jingmut ïa ka HYC u la ong, “kum kane ka por phi donkam ban pynsgewthuh ïa ki nongsngap bad ki nongialam namar donkam ka jingïatrelang, kumta shwa ban leh ïa kano kano ka kam hikai shwa ïa ki nongshong shnong lyngba ki Dorbar Shnong, pynsngewthuh ïa ki ba kane ka kam kaba phi leh ka long kaba bha ka ban tei pat ïa ka imlang ka sahlang bad hadien kane kata ka jingmut, ka jingthmu kan long kaba jop”
Ha kajuh ka por u Dr P.Nongtdu u al ai ka jingkhublei kitbok kitrwiang ïa ki nongialam bad ki dkhot jong ka HYC East Jaiñtia Hills District ba kin lah ban trei bha ïa ka kam na ka bynta ka bha ka miat ha ka imlang ka sahlang.
U President jong ka Jaiñtia National Council, u bah Sambormi Lyngdoh u sneng bad kyntu ïa ki dkhot ka HYC ha kaba u la ong ba kum ki sengbhalang dei ban long bunsien kiba ryntih, ym dei ban don ka mynsiem sngew sarong bad ruh ym dei ban iaid lait na ki bor pyniaid shnong kum ki Waheh Shnong namar ka jingshakri ïa ka ri bad ka jaitbynriew ka sdang shwa na shnong ki thaw, na ki ïing ki sem bad na ki dong ki shnat, kumta donkam ban iakren bad ki Waheh Shnong bad ki VDP shnong lada don kino kino ki kam, u la ong ruh ba ban long ki nongialam kam dei ka kam kaba suk, bun ki jingshah kynthoh, ki jingshah kynnoh ki mih watla ki seng ki trei bor bah na ka bynta ki dawbah jong ka ri bad ka jaitbynriew, u la bynrap ruh ba ka jingmih ki jingkynnoh ka dei namar ka jingmih bad jingdon ki seng ki bym don satia ka jingkitkhlieh ïa ka ri bad ka jaitbynriew
Haba kren halor ka jingjyllei u drok, u bah sambormi u kyntu ïa ki seng niam bapher bapher bad ki Balang bapher bapher ba kin sngewbha ban buh lem ha ki jingdwai namar ba dei tang u Blei bad ki jingiasyllok kiba lah ban wanrah pat ïa kito kiba la ngop ha u drok ba kin wanphai biang biang sha ka imlang ka sahlang.
Kiba la ai jingkren ki kynthup ruh u Waheh Shnong Ladrymbai Datsim-peiñ, u bah T.Suchiang, u President HYC East Jaiñtia Hills District, u bah Preios Pale, u General Secretary HYC East Jaiñtia Hills District, u bah Arky Lamare.
La sdang ïa ka jingialang da ka jingdwai na u Fr Aibor Denis Nangbah, uba dei u Principal jong ka Good Shepherd Higher Secondary School Ladrymbai bad ïa ka jingialang la pynïaid da u Vice President HYC Central Body, u bah Francis G. Mawlong.
Ki nongialam bad ki dkhot jong ka HYC East Jaintia Hills District, kiba la jied bad pynsmai hynnin ka sngi ki kynthup u President, u bah Preios Pale, ar ngut ki Vice President, u bah Becareful Rymbai bad u bah Pass Khaii, General Secretary, u bah Arky Lamare, Joint Secretary, u bah Lewis Lapasam bad u bah Aite Sana, Organising Secretary, u bah Story Bareh, Education Secretary, u bah Emarson Dkhar, Publicity Secretary, u bah Dismit Sumer Sport Secretary, u bah Leki Khaii lem bad kiwei kiwei.