Nongstoiñ, Nailur, 08: Ki nonghikai jong ki skul SSA (Sarva Shiksha Abhiyan) kiba don hapoh ka shatri jong ka All Meghalaya SSA School Teachers Asso-ciation ha ka sngi saitjaiñ ka 7 tarik Nailur, ki la pynlong ïa ka jingïakynduh lang ha Mount Hermon Secondary School New Nongstoiñ, ha kaba ki nonghikai jong kitei ki skul kiba dei na rilum Garo kaba la tip kum ka All Garo Hills SSA School Teachers Association, na West Khasi Hills, ri Bhoi, Jaiñtia Hills, South West Khasi Hills bad kiwei kiwei ki district ki la ïa poi.
Ha ka jingïalang kaba la pynïaid da u babu Peter Thyrniang president ka AMSSASTA la ïoh ban pynsgew ïa ka jingtrei kam jong ka Association ha kine ki snem ba la dep baroh. Nalor kata la ïoh ruh ïa ka jingpynshai na u president jong ka AGSSASTA ha kaba ïadei bad ka jingtrei kam jong ka Association ha ri lum Garo bad hadien ka jingpynshai utei u president ka AGSSASTA, u la pynsngew ba halor ki jingeh ba ki nonghikai SSA ha ri lum Garo ki ïakynduh ki la dep ban pynsgew sha u Conrad Kongal Sangma Myntri Rangbah, u bah Prestone Tynsong Symbud Myntri Rangbah bad ha u Rakkam Sangma Myntri ka tnad pule puthi ka jylla hynrei haduh mynta kim pat ïoh kano kano ka jubab kaba shai.
Ha katei ka sngi ka jingïalang ka la ïatai sani bha halor kiba bun ki jingeh ba ki ïakynduh hynrei ka mat kaba kham don kam kaba ka jignïalang ka la ïaktait bha ka dei tang ha kaba ïadei bad ka enhancement kaba long kum ka arear kaba ka sorkar ka hap ban siew na ka bynta ki nonghikai skul SSA.
U babu Peter Thyrniang president ka AMSSASTA haba ïakren bad ki lad pathai khubor hadien ba la wai ka jingïalang, u la ong ba hadien katei ka jingïalang ka Association ka la pan jingmut na baroh ki para nonghikai bad hadien ka jingai jingmut, la pdiang bad mynjur bad da kawei ka sur ba hapoh une u bnai, kin sdang da ka jingïakhih kaba khlem buh por tad haduh ba ka sorkar kan ai ha ki ïa ka jubab kaban pynhun lang ïa baroh.
Utei u nongïalam ka Association u la kyntu ruh ïa baroh ki nonghikai jong ki skul SSA ban klet noh ïa ki jingsngewpher kynhun ne Association. Hynrei kin pynkhreh ban leit ïashimbynta ha ka jingïakhih ynda la dep pynbeit ïa ka por, namar katei ka jingïakhih ka long ban pynsngew sha ka sorkar, ba kan pynurlong noh ïa ki jingdawa jong ki, kiba la sahteng la slem.
Ka sorkar kam dei ban kheiñ dew thala ïa ki nonghikai namar ki nonghikai ki dei ki nongsaiñdur na ka bynta ka lawei jong ki khun ki kti jong ka jylla. Lada ki nonghikai kim trei shitom yn ym don babu, sahep, ophisar ne ki riew nang riew stad bad kano kano ka jylla ne ka ri ha ka pyrthei kan ym lah ban kiew shaphrang lada ki paitbah ki dei ki bym nang bym stad.
