Nongstoiñ, Nailar 7: Katkum ka kyrwoh khubor na ki nongïalam ka seng KSU Mawshynrut Circle, la ong ba tang hadien khyndiat por marsien mih na thanad hadien ba shah khot hajir ïa ar ngut, ki nongïalam jong ka Circle ïoh bat biang ka Seng ïa ki bar jylla ba wan trei beaiñ ha ka thaiñ.
Ha kane ka sngi ka 7 tarik Nailar 2024 hapoh ka jingïalam jong u samla Jefferson Sohshang Assistant General Secretary bad u samla Bimol Diengdoh Assistant office Secretary, ryngkat ki dkhot ki la ïoh ban bat ïa phra ngut ki bar jylla ba wan bylla thep siej hapoh ka thaiñ.
La ong ba haba pan ïa ki kot ki sla, kitei ki bar jylla kim shym la don kano kano ka kot ne wat ki kot ba pyni ba ki dei ki nong India. Kumta mar mar na ka liang ka seng ki la phah leit phai noh ïa kitei ki bar jylla sha ki jaka ba ki wan.
