Khliehriat, K’Lyngkot, 28: Ki nongñiah trok kiba kit jingkit, kiba iaid lyngba na ka surok National-Highway -6 na Umtyra, East Jaiñtia Hills District, hynnin ka sngi ka 26 tarik kullalyngkot ki la ïakynduh jingeh haduh katta katta namar ka jingbat No-Entry ki pulit ha Umtyra kaba na ka daw ka jingrakhe ïa ka sngi Republic Day ha Khliehriat.
Haba kren sa ki pathai khubor bad lyngba u kyrwoh ba la phah, ki nongñiah trok ki la pynpaw ka jingsngew bynñiaw bad ong ruh ba ki la thngan bad jan iap thngan, namar ka jingbat No-Entry kaba da ki bun kynta, naduh ka por 7 baje mynstep haduh ka por 12 duna mynsngi.
Ki ba ñiah trok ki la ong ruh ba ha kane ka sngi ym don dukan ja, dukan sha kiba don hajan bad kiba bun ki dukan ruh ki khang, ki la pynpaw ka jingsngewsih namar ki bor district ki khlem shim khia ban pyntip lem lyngba ki pathai khubor ne ki social media ba yn bat No-Entry bad ong ba kane ka dei ka bym pyrkhat lem ïa ki nongñiah trok kiba duk ba suk “hooid ngi ki nongñiah trok ruh ngi sngew thuh hi ba kum kane ka ju jia hi ngi tip ïa ka ta, hynrei ban shu bat no entry pat naka bynta ki wei ki wei ki program ki la dei ban ai jingtip shuwa lyngba ki social media namar ba kum ha kine ki sngi bun ki dukan ruh ki khang bad don ruh ki jaka kiba jngai bha ki dukan, kane ka buh jingeh ïa ngi kiba ñiah trok” pynpaw ki nongñiah trok kiba sahkut No Entry ha Umtyra.
