Shillong, Rymphang 24: Ka Meghalaya High Court ha ka sngi Nyngkong ka la bthah ïa ki bor pynïaid skul jong ka St Anthony’s Lower Primary School ba ki dei ban pynthikna ba ka plan bad ka jingpynwandur ïa ka jingtei jong ka skul ba thymmai ka dei ban kham bun ne ïasyriem bad kaba la pynpra.
Ka ïingkashari kaba kynthup ïa u Chief Justice IP Mukerji bad u Nongbishar W Diengdoh ha ka hukum ba la pynmih hadien ba shong bishar ïa ka PIL ka la ong, “Da kaba pyrkhat ïa kine ki jingshisha baroh haneng, ngi ailad ïa ki bor pynïaid skul ban tei pat ïa ka ïingskul hynrei ka plan bad ka jingpynwandur ïa ka ïingskul ka dei ban long kaba kham bun ne kaba isynriem bad kaba la pynpra. Lada dei ban pynkylla ïa ka plan ba la mynjur, lah ban leh ïa ka bad dei ba ïoh ïa ka jingmynjur na ka Meghalaya Urban Development Authority (MUDA)”.
“Ki bor pynïaid ki lah ban pynïaid shakhmat bad ka jingshna thymmai ïa ka ïingskul hynrei kam dei ban pynkylla ïa ka hok da kaba ai sha kiwei pat, thaw jingeh ne pynïakhlad bad ka jingbat ïa ka nongkynti khlem ka jingbit na ka Kashari,” la bynrap la Ïingkashari.
Ka Ïingkashari ka la bthah ruh ïa ki nongshah kynnoh pynkheiñ hukum (contemnors) ba ki dei ban aiti ïa ka affidavit ha kaba ïadei bad ki jingkylli jong ka ïingbishar hapoh ka 17 tarik u Risaw.
“Mynta, ka jingkylli kaba hap ban jubab ka dei kane, ka hukum ba la pynmih da ma ngi ka dei kaba la pynmih ha ka 9 tarik Nohprah 2024. Ki bor pynïaid skul ki tip bha ïa ka. Ka Ïingkashari watla ka la khang ha ka shuti Khristmas, ka Vacation bench ka la shong bishar khlem sangeh. Balei kane ka jingkam ba ap ka jingma ïa ka jingtei bad ka jingdonkam ban pynpra noh ym shym la wanrah sha ka jingtip jong ka vacation bench bad pan jingbit ban pynpra ïa ka Ïingskul barim?”.
Haba ïa kane ka mukotduma la buh ban shong bishar ha ka sngi ba bud jong ka jingplie ïa ka Ïingkashari ha ka 28 tarik Kyllalyngkot, 2025, balei ha ka por ba ïoh shuti ka Ïingkashari, ba hap ban pynpra ïa kane ka ïingskul, haba la ailad ba kan ïeng baroh shikatta?” ong ka meij ki nongbishar.
Shillong, Rymphang 24: Ka Ïingkashari Meghalaya High Court ka la bthah ïa ka National Highway Authority of India (NHAI) ba kan pynthikna ba ka surok bah NH-6 baroh kawei, kaba jrong 102.225 km, kan long kaba lah ban ïaid da kaba shngaiñ ki kali hapoh ka por kaba biang.
Ka Ïingkashari kaba kynthup ïa u Chief Justice IP Mukerji bad Justice W Diengdoh ha ka hukum ba la pynmih halor ka PIL ka la ong, “Ngi khmih lynti ba ka surokbah baroh kawei kaba jngai 102.225 km kan long kaba lah ban ïaid shngaiñ ki kali, khlem kano kano ka jingkhanglad hapoh ka por kaba biang.”
Ka la bthah ruh ïa ka jylla bad ïa ka NHAI ba kin ai ïa ka affidavit lyngkot kaba dei ka kaiphod jong ka jinglong jingman shwa ka tarik ban bishar biang ha ka 16 tarik u Risaw.
“Ngi kyrmen skhem ba ka kaiphod jong ka jinglong jingman kan pyni ïa ka jingpyndep ïa ka projek,” ong ka Ïingkashari.
Ka la pule bniah ïa ka kaiphod jong ka Amicus Curiae ha kaba ïadei bad ka jingïaid shaphrang jong ka jingtrei ban maramot ïa ka surok bah (NH -6) hapdeng ka Jowai bad Ratacherra.
Haba sngap ïa u AAG ka Jylla bad ïa u S Sengupta, u nongïasaid aiñ jong ka NHAI, ka Ïingkashari ka la ong, “Ngi don ka daw kaba biang ban ngeit ba ka kam maramot ka ïaid shaphrang ha ka rukom kaba sngewhun.”
“Hooid, ki don katto katne ki jingeh kiba dangsah kum ki thliew kiba heh, ki nar kiba la paw na ki jingkieng kiba rit kumba la kdew da u Amicus Curiae ha ka kaiphod jong u. Hynrei kine ki mat kim da long kiba heh than bad ngi bthah ïa u nongshah mudui -NHAI ban pynbeit kloi katba lah ïa ki,” ka la ong.
