Shillong, Nailar 25: Ki shipai BSF bad ki Pulit ka jylla Meghalaya ki la ïoh ban bat lai tylli ki trok kiba leit sha Lyngkhat bad kila ïoh ban kem ar ngut ki nong India ha khappud bad ka Bangladesh.
Kine ki lai tylli ki trok ki dei kiba kit shini da ka jingthmu ban phah shallan tuh sha Bangladesh na ki thaiñ Lyngkhat kaba hab ha u pud u sam jong ka East Khasi Hills District, ka shini baroh ba la ïoh kurup na ki lai tylli ki trok ka la kot sha ka 74,000 hajar kilo.
Ki BSF kila ïoh ban bat ruh ar ngut ki nong India kiba don hapoh kitei ki kali, haba la kylli ïa kitei ki nongñiah ïa ki trok kim shym la lah ban ai kano kano ka jingpynshai ha kaba ïadei bad ka shini kaba ki la kit, kumta ki la kurup ïa ki trok bad kem ïa ki briew ruh.
Na ka liang jong ki BSF ki la ïoh ban kem ïa kine ki briew dei na ka jingïatreilang bad ki pulit jong ka jylla Meghalaya. Hadien ba kila pyndep ïa ki jingdonkam baroh katkum ki kyndon aiñ la aiti noh sha ki pulit jong ka Pynursla ba kin leh ïa kaba don kam katkum ka aiñ.
