Shillong, Nailur 28: Ka Seng Hynñiewtrep Youth Council Sengkmie ha ka 28.9.2024 ka la pynlong ïa ka jingïalang ia mir jingmut ha Khasi National Dorbar Hall, Mawkhar halor u droks bad ki Nongïalam Shnong, ki Seng Longkmie, ki Seng Samla bad kiwei ki kynhun jong ki shnong ba hab hapoh Sor Shillong bad khap sor ha ryngkat ki kmie ki kpa jong ki samla kiba lah ngop ha u droks. Lah ïadon ruh ki Nongmihkhmat na ka Manbha Foundation bad VHAM, kiba dei ki Seng kiba trei halor kine ki bynta.
Ka Seng ka lah shim ïa ki jingai jingmut jong kiba lah wan sha kane ka jingïalang bad ïa kine ki jingai jingmut ka Seng kan sa leit rah hakhmat ka Sorkar ban buh ïa ki jingdawa ba ka Sorkar ka dei ban pynurlong bad lada ka Sorkar kam pynsngap, ka Seng ha ryngkat ki paidbah ka Bri u Hynñiewtrep kan sa pynlong ruh ïa ki prokram ïakhih ki bapher bapher pyrshah ïa ka Sorkar.
Na ka liang ka Seng ka lah pynbna ruh ha kane ka sngi ba ka sorkar Meghalaya ka don ïa kata ka Drug Reduction Elimination & Action Mission (DREAM). Hynrei kumba long ka kyrteng DREAM, kumta hi ruh ki kam ki shu kut tang ha jingphohsniew khlem da don ki kam. Kaba shu ïa phohsniew ban rat dyngkhong ïa u drok khlem da trei pat da ki kam ne ki deed, kam don jingmut bad kita ki jingthrang ka Sorkar kin shu sahkut tang kum ki jingphohsniew.
Kumta, ka HYC kan wanrah noh da ka DEED (kaba mut ki kam) Misson ban pynurlong ïa ki jingdawa jong ka Seng bad ïa ki kyndon ba lah thoh hapoh ka DREAM jong ka Sorkar. Ym dei shuh ban kut tang ha ki jingphohsniew (DREAM) hynrei hap leh da ki kam (DEED). Ka kam ka long ban pyntrei hi noh ïa ka DREAM namar ka sorkar ka shu thoh khlem pyntreikam.
