Kyntu ka kynhun ki Balang ïa u CM ban tuklar mardor halor ka jingkhihwin ha ka jylla

Shillong, Nailur 28 : Ka Khasi Jaiñtia Christian Leaders Forum (KJCLF) ha ka sngi Saitjaiñ ka la kyntu ïa ka sorkar jylla hapoh ka jingïalam jong u Conrad K Sangma ban tuklar bad shimkhia mardor halor ka jingmih ki jingkhihwin kiba jur ha ka jylla kiba la ktah ïa ka jinglong bapher bapher bad ka jinglong shipara jong ki paidbah ka jylla Meghalaya.
Ha ka kyrwoh khubor ba la pyllait da u Secretary ka KJCLF u Rev Dr EH Kharkongor u la ong, “Ban pynsngewthuh ïa ki nongshong shnong halor kine bad ruh ban lait na ka jingkhuslai ha ka jingïadei bad ka imlang sahlang, ka KJCLF ka kyntu ïa u Myntri Rangbah ka Jylla bad ïa ka sorkar ban shim ïa ki sienjam kiba donkam bad kiba lah ban ïada ha kaba teh lakam ïa kum kine ki jingjia.”
U la ong ruh ba ka jylla bad ka thaiñ baroh kawei ka la sakhi ïa ka jingkhihwin kaba jur bha hadien ba la mih ki kynhun kiba kwah ban pyrshah ïa ka jingshohdoh ïa ka masi kaba la buh ban pynlong ha ka 02tarik u Risaw mynta u snem ha ka jylla.
Shuh shuh u ong ruh ba kane ka jingthmu ka la wanrah ruh ïa ka jingsngew diaw, ka jingsngew wit bad ka jingkhuslai jong kiba bun balang.
U Rev Kharkongor u la kdew ruh ba ki nongïalam jong kitei ki kynhun pyrshah shohdoh masi ki dei kiba wan na shabar ka Jylla Meghalaya, kumta u ong ba ka don ka jingsyier ba kan ktah ïa ka jinglong bapher bapher kaba ju don ha ka jylla baroh shi katta.
U ong ruh ba kum kine ki jingjia ki lah ban wallam ruh ïa ka jingsngew pher niam, ka jingbym don shuh ka jingïashaniah nalor ba ka lah ruh ban ktah wat ia ka shong suk shongsaiñ.
Da kaba kdew ba wat ha ki iew ka pyrthei, ka doh masi ka la buh ïa ka India ha ka kyrdan kaba saw kum ka Ri kaba pynmih bun bha ha ka pyrthei, utei u heh ka KJCLF u la ong ba kum ha Meghalaya ruh kumjuh kiwei ki jylla ba don markhap ki sakhi ba ka iew doh masi bad kiwei ki jingri ki dei ka bynta kaba hakhmat eh na bynta ka kamai kajih bad ka rukom bam jong ki trai ri trai muluk.
Kumta u ong, ba ka long kaba donkam haduh katta katta ïa ka sorkar ha baroh ar tylli ki sorkar kata ha ka sorkar jylla bad sorkar Pdeng ban peit ba kane ka jingthmu kan ym dei ban ktah jur da kumwei pat.