Ban rat dyngkhong ïa ka jingsniew u drok, ai jinghikai ka ophis u SP South West Khasi

Mawkyrwat, Jylliew 20: Ryngkat ka jingthmu ban rat dyngkhong ïa ka jingsniew jong u drok hapoh ka Ri India, ka jylla bad ki distrik, na ka liang ka ophis jong u Superintendent jong ki Pulit ka South West Khasi Hills District ka la ïoh ban pynlong ïa ka Awareness Program halor ka phang, “Fight Against Drugs Abuse” kaba la sdang naduh ka 13 tarik bad pynkut ha ka 26 tarik u Jylliew, 2023.
Ka jingthmu jong kane ka program ka long ban pynsngewthuh ha ki khynnah skul bad ki paidbah nongshong shnong ba kim dei ban ai lad ba u drok un kharoi ne un jyllei hynrei ki dei ban ïeng tylli ban pyrshah ïa ka jingpyndonkam ne jingkhaïi ïa u drok. Shuh shuh ki mat ba kongsan jong kane ka program ki long, ka jingktah u drok ïa ka koit ka khiah ha ka met bad ha ka jingmut jingpyrkhat ïa ki ‘riew shimet ba pyndonkam ïa u drok, ka jingktah ïa ka imlang sahlang, ka ïing ka sem bad ka shnong baroh kawei bad kumjuh ruh ki lad jingïarap kiba lah ban ïoh lada don kiba ngop kum ha kane ka apot.
Ïa kane ka program la dep ban pynlong hapoh Ranikor Sub Division ïa kane ka program la pynlong hapoh Shnong Pamdaba bad Shnong Dirang ha kaba ki nongkren ki long u Insp C. Ch. Marak, C.I. South bad ABSI A. Syiemlieh jong ka Ranikor Police Station.
Katba hapoh Mawkyrwat, ïa kane ka program la pynlong hapoh Little Star Secondary School, Mawkyrwat ha kaba ki nongkren ki long u bah D. Mawlein, MPS, Deputy Superintendent of Police, u Insp W. Sangma, C.I. North bad ka WPSI Moon moon Arengh.