Ban kyntiew ïa ka rep ka riang, donkam ka jingïatreilang na baroh ki liang, kong P.S. Diengdoh

By Mawphor Editor On Aug 31, 2022

Mawkyrwat, ‘Nailar, 30: Ka kong P.S. Diengdoh, BPD, AMTA napoh ka ophis District Agriculture Office, South West Khasi Hills District ha ka jingïalang ïa mir jingmut halor ka kam rep kam riang hapoh Shnong Shaid Shaid Umoid ka la pynkynmaw ba lada ki nongrep ki kwah ban kyntiew ïa ka kam rep kam riang ka long kaba donkam ba kin don ka jingïatreilang na baroh ki liang naduh ki tnad treikam jong ka sorkar, ki paidbah nongshong shnong bad kiwei de.
Kum ka kongsan haba bynrap shuh shuh ïa ka jingkren ka la pynkynmaw ruh ba kum ka ophis jong ka kam rep kam riang kaba don ha kane ka distrik ka la bthah ïa baroh ki nongrep ba kin don noh la ki jong ki Farmer Identity (ID) khnang ba kan long ka jingïarap na ka bynta jong ki hi da kaba kin leit mih hapoh ka ophis District Agriculture Office kaba don ha Laitlawsang.
“Kane ka ‘Farmer ID’ ka dei kum ka ‘EPIC Card’, bad lada ki nongrep ki kwah ki lad jingïarap kin leit mih hapoh ophis treikam da kaba rah lang de bad ka ID jong ki nongrep”, ong ka kong Diengdoh. Ha kaba ïa dei bad kane ka ID ne ka Farmers ID ka la ban ba lyngba ka jingdon jong kane ka ID ka lah ruh ban ïarap ban thaw ki lad ki lynti ban pynïoh ïa ki skhim na ka sorkar lyngba ki kot ki sla ba ki nongrep ki don bad kaba donkam ruh ba shwa ban leh ïa ka Farmers ID ki dei ban don ruh ïa ka Aadhaar Card bad ki dei ban ruh don ïa ka ‘PM Kisan’ ha kaba lyngba ka jingdon jong ka PM Kisan ki nongrep kin ïoh jingïarap haduh T. 6 hajar shisnem.
Namarkata, ka la kyntu ïa ki paidbah nongrep ba lada ki don ki nongrep ki bym pat leh ïa kane ka ‘PM Kisan’ kin leit mih hapoh ka ophis jong u District Agriculture Office, South West Khasi Hills District khnang ba kin ïoh ki jingpynshai kiba bun. Ka la batai bniah ruh ba ka jingdon jong kane ka ‘PM Kisan’, ka sorkar India kan ai jingïarap tang ïa iwei na kawei ka longïing nongrep bad lada ki don ki khun ki kti kiba la trei ha ki kam sorkar kita kim lah shuh ban ïoh bynta lyngba kane ka skhim ne kim lah shuh ban applai ïa kane.
Ka kong P.S. Diengdoh ka la ai jingtip ruh ba kan sa don ka jingwan leh ‘census’ ïa ka jingdon jong ki jaka rep ha ki shnong ki thaw, kumta ka la buh ka jingkyrpad ïa ki Myntri shnong, ki paidbah nongrep ba ki dei ban shimkhia halor kane ka bynta namar na ka liang ka ophis kan sa wan ban jurip bad phah ruh ka jingthoh ha ki bor ba hakhlieh. Ha kajuh ka por ka la pyntip ruh ba kumba ka sorkar ka la dep ban pynmih ïa ka ‘Fertilizer Policy’ ba thymmai, ba kum ki nongrep ha ki dong ki shnong ki dei ban rep noh da ka jingrep khlem da pyndonkam dawai sboh hynrei kin rep noh da ki sboh ba ki shna hi namar lyngba ka jingrep bun jait ki jait mar bad ri ruh shibun ki jingri ki lah ban pynmih ïa ka sboh kaba bun.
Ha kane ka sngi la ïoh ruh ka jingkren lamphrang halor ka jingthmu ba kyrpang jong kane ka prokram da ka kong R. Kharlyngdoh, BPM, MSRLS, South West Khasi Hills District ha kaba ka la ong ba na ka liang ka ophis jong ka Meghalaya State Rural Livelihoods Society (MSRLS) kaba dei peit ïa ka NRLM hapoh jong ka Mawkyrwat ryngkat ka jingïatreilang bad ka Kudumbashree NRO napoh Kerala ki la don ïaka projek ba ki khot ka CBO-PRI Convergence Project. Ka la batai ruh ba ha kane ka projek ka don ka jingïatreilang naduh ki Self Help Groups (SHGs), ki Village Organisation (VO) jong ki shnong ryngkat ki paidbah nongshong shnong ne ka Village Council (VC) ne VEC bad ki tnad treikam jong ka sorkar.
Ka la ïathuh ruh ba kane ka CBO-PRI Convergence Project ki la sdang naduh Naitung, 2021 ha kaba kane ka dei ka prokram kaba khadduh hapoh jong ka Jakrem Cluster bad hapoh jong kane ki don haduh 18 tylli ki shnong kiba la ïoh ban ïatreilang ban pyntyllun ïa kiba bun ki kam. Namarkata, lyngba kane ka prokram ba la ïadonlang naduh ki doktor napoh ka Veterinary, ki nongtrei hapoh Fishery Department, Branch Manager, Meghalaya Rural Bank Mawkyrwat bad kiwei de ha kaba kan sa long ka jingïarap shibun lyngba ka jingpynshai jong ki lyngba kine ki prokram.
Kiwei pat ki nongkren kiba la ai ki jingpynshai sha ki paidbah nongrep jong ki saw tylli ki shnong kata Shaid Shaid Umoid, Diwah Shaidmoit, Pyndendiwah & Mawpon Myrkhew halor kumno ba kin lah ban pynïaid shaphrang ïa ki kam jong ki la ka long ha ka kam rep kam riang, ka ri jingri bad ka ri dohkha ki long u Dr. W. Lyting, District Animal Husbandry & Veterinary Officer, South West Khasi Hills District, kong Vanessa Khyriem, Program Managers, Fishery Department, kong K. Nongrum, Branch Manager, Meghalaya Rural Bank Mawkyrwat, na u Myntri Shnong Shaid Shaid Umoid, u bah Kranly Wahlang.
Hadien ka jingïalang la ïoh ruh ka jingregistar na ka bynta ki jingri lyngba ka District Animal Husbandry & Veterinary Department bad ka jingsam ïa ki dawai jong ki mrad kata ki dawai jong ki sniang – 58 tylli sha ki 16 ki nongri, blang – 37 tylli sha ki 7 ki nongri bad dawai masi – 38 sha ki 9 ngut ki briew kiba dei ki nongri jingri.
Ïa ka jingïalang la pynïaid da ka kong A. Jyrwa, ka jingkren na u Secretary jong ka Shnong Shaid Shaid Umoid, bah Dimarding Kharbani bad ka jingkren khublei na ka kong C. Syiemlieh, President Pyndendiwah Village Organisation.