Shillong, Nailar, 30: Ka kynhun shipai India ha ka sngi Saitjain jong ka taiew baladep ki la lum lang ïa ki samla kiba angnud ban ïoh rungkam ha ka tnat shipai jong ka ri India ha ka jingïalang kaba la long ha Wahingdoh Community Hall, Shillong.
Ïa kane ka jingpynrungkam shipai lyngba ka Agniveer Scheme ba la pynbna da ka Ministry of Defence ka Sorkar India, la pynlong da u Bah Michael Kharsyntiew, uba long u nongtrei mon sngewbha ha ryngkat ka jingïatreilang bad u dkhot barangbah jong ka BJP u Bah Ralden Shabong ha kaba la sakhi lang da ki Ophisar shipai kiba kynthup ïa u Colonel Vikash Singh bad ka kynhun jong u, lem bad ki nongkitkam jong ka shnong Wahingdoh hapoh ka jingïalam jong u Rangbah Shnong u Bah Ronjit Marbaniang.
Bun ngut ki samla na ki dong bapher bapher ki la ïashim bynta ha ka jingïasyllok bad u Colonel Vikash Singh uba la pyntip shaphang ki lad ki lynti kumno ban ïoh rungkam ha ka tnat shipai jong ka ri India.
