Shillong, Nailar, 30: Ka HANM hadien ba ka la ïoh ka jingujor ba ka Marba Hub Shopping Mall ka dei kaba la pyntrei Benami bad kaba la shu wanrah ïa ki bar jylla ban pyntrei ha kane ka jaka, ka la don ruh ka jingleit khang jong ka seng ïa ka jaka leit bar bad hadien kane ka la mih ka jingïaujor ejahar mar kylliang hynrei mynta kane ka kam ka la poi sha ka jingïasuk.
U President rangbah ka HANM u Bah Lamphrang Kharbani ha ka jingïakren bad ki lad pathai khubro u la ong, hadien ba ka seng ka la wad jingtip bniah bha ha kaba ïadei bad ka Marba Hub Shopping Mall kaba don ha Khyndai Lad, Shillong la shem ba kam dei kumba la kynnoh, kumta ka HANM ka la bthah ïa baroh ki shnat treikam jong ka Seng ban da wad bniah shuwa ban shim ïa kano kano ka siemjam haba don kano kano ka jingkynnoh pyrshah ïano ïano.
Ha ka jingtohkit, ka seng ka la shem ba ïa ka Marba Hub la long trai da u paradoh para snam bad ka ka jingkynnoh pyrshah ïa u Bah Mayven T. Marbaniang ba u leh Benami ka long kumba kynnoh ïa ka jaidbynriew bad ka long ka jingkynnoh kaba bakla.
Kum ka seng ka ai mynsiem ïa u Bah Mayveen Marbaniang uba long uwei na ki dkhot ka jaidbynriew Khasi uba la kiew ha ki kam khaii pateng ba la lah ban ïakop bad kiwei ki jaidbynriew ha ka treikam treijam bad ka long ka burom ba la don ïa ki briew la jong ban poi sha kane ka kyrdan, ong u Bah Kharbani.
U Bah Kharbani u la ong ruh ba ka Seng ka sngew ba ka jingdon ki briew kum u Bah Mayven Marbaniang ka long ka jingkyrkhu ïa ka jaidbynriew ha kaba ym donkam shuh ban da beh ïa kiwei ki jaidbynriew hynrei ki la phet hi namar ba ïa ka kam ka jam la lah ban bat hi ha lade, lada ki briew jong ngi kila lah ban bat hi ïa ka kam kiwei ki jaidbynriew kin nym ïoh lat ban wan phrung khlieh hakane ka jylla.
Kum ka seng ha dien ba ka la wad ïa ki jingshisha baroh la shem ba u trai jong ka Marba Hub u la noh syniang shibun ki kam kiba bha na ka bynta ka bha ka miat ha ka jylla bad kyrpang ïa ka jaidbynriew naba u la trei ïa la kam ha kaba jarjar khlem da kwah burom.
U la ong ruh ba ka seng ka ai ka jingkitbok kitrwiang ïa u Bah Mayven T. Marbaniang bad ka iing ka sem jong u ba un dang lah ban kiew ha ki kam ki jam bad kane kan long ka burom ïa ka jaidbynriew.
