Lada ka sorkar Assam ka kynthup ïaka KAAC balei ka sorkar Meghalaya kam kynthup ïaka KHADC, JHADC haka jingpynbeit pud: RBYF
Nongpoh, Nailar 30: U Bah Bipul Thangkhiew President ba rangbah ka RBYF, mynta ka sngi u la buh jingkylli halor ka jingshah kyntait ka Khasi Hill Autonomous District Council (KHADC) bad Jaiñtia Hills Autonomous District Council (JHADC) halor ka kam pynbeit pud ha kane ka wat kaba ar, katba ka sorkar Assam ka kynthup ïaka Karbi Anglong Autonomous Council (KAAC) haka jingpynbeit pud kane ka wat ba ar, ba lada ka sorkar Assam ka kynthup ïaka KAAC balei ka sorkar Meghalaya kam kynthup ïaka KHADC, JHADC? haka jingpynbeit pud kumba ki shnong kidei hapoh ka jingpeit jingkhmih jong ki District Council.
“Ha ka jingïakren jong ki ar myntri Rangbah ka jylla Meghalaya bad Assam, la kren shai ba ha kane ka jingpynbeit pud ka wat ba ar, yn kynthup ruh ïaka KAAC namar ki don ki jaka kiba ïatyngkhuh bad ka KAAC haka thaiñ Block II, hynrei shaei jah ka KHADC bad JHADC? Namar ïaki jaka puta bad ki dulir khyndew la ai da u syiem lane ki longsan hapoh ka jingpeit jingkhmih jong ki District Council ym ka sorkar jylla” la ong u Bah Bipul da kaba bynrap ruh ba kane ka paw shai ba ka sorkar Meghalaya kam patiaw lane kheiñ snep ïaki district council kiba don ka bor halor ka khyndew ka shyiap.
U la ong ruh ba kum ka seng ka dap da ka jingsngewkhia ba ki District Council ki shu sngap jar halor kane ka bynta ha kaba ka sorkar shen kan sa thaw ïaki Regional Committee ban sa lamkhmat da ki Myntri jong ka sorkar Meghalaya bad Assam, ha kaba ka Karbi Anglong Autonomous Council (KAAC) kan sa don bynta haki 3 tylli ki jaka napdeng 6 tylli ki jaka kajia pud ha ka jingpynbeit pud haka wat kaba ar.
“Kane ka jingbym kheiñ snep jong ka sorkar Meghalaya ïaki District Council ka dei ka jingpyndem tdong bad ngeit beit katba ong u Myntri Rangbah ka Assam, kumba ka Borduar, Langpih, Nongwah Mawtamur bad ka Desh Doomreah ki hap hapoh ka jingpeit jong ka District Council, bad la shem ruh ka District Council ka jylla Meghalaya ki shah kyntaid ruh wat hadien bala soi ïaka MOU haka jingpynbeit pud ka wat ba nyngkong”
Namarkata naka liang ka seng kala kyrpad sha ka sorkar ba ka dei ban burom ïaki District Council bad ka District Council kaba dei ruh ban shim ïaka iktiar, bynrap u Bah Bipul.