Ban kyntiew ar shah ïa ka ïoh ka kot na ka rep ka riang ai jinghikai ka ophis DAO ha Thuruk EJHD
Khliehriat , Naiwieng 7: Ka ophis jong ka District Agriculture Officer East Jaiñtia Hills District, ha ryngkat ka jingïatreilang bad ka KVK kumjuh ruh bad kiwei kiwei ki tnat, kum ka ATMA bad ka tnat Vetrrinary, myn ha ka 4 tarik mynta u bnai ka la pynlong ïa ka prokram ai jinghikai lane ka awareness ïa ki paidbah nongrep jong ka shnong Thuruk kaba hap hapoh ka Saipung C&RD Block, kane ka prokram ka long halor ka jingthmu ban pynurlong ïa ka jingbuh thong ka sorkar pdeng ban kyntiew ar shah ïa ka jingïoh jong ki nongrep kata kat haduh u snem 2030.
Haba kren sha ki paidbah, ka District Agriculture Officer, East Jaiñtia Hills District, ka kong M.J.Shylla, ka la pynshai halor ka jingthmu ka sorkar ban kyntiew ar shah ïa ka jingïoh ki paidbah nongrep haduh u snem 2030, kumta ka la ong ba ka long kaba donkam ban pynlong ïa ki prokram ai jingpynshai sha ki paidbah ba kin tip ïa ki rukum ban rep bad ri jing ri khnang ban kyntiew ïa ka jingïoh ha ka kamai kajih ka ban long ka jingioh nong ïa ki.
Ka DAO, ka kong Shylla, ka la ïathuh ruh ba ka tnat treikam jong ka KVK ka la shim ïa ka bynta ba ha khmat ha kaba ai jingpynshai sha ki nongrep bad pynshai ba ki donkam ban shim ïa ki lad ban rep ïa ki jait jingrep kiba mih kloi bad kiba pynmih shibun ha kaba ïadei bad ka kamai kajih, ka tnat ka la wanrah ruh ïa u doctor uba na ka tnat ri jingri ne Veterinarian Doctor kiba la ai jinghikai ïa ki paidbah kumno ban ri jingri, kumno ban ai injek vacine ïa ki jingri bad kumno ban pynkha roi kloi ïa ki jait jingri kum ki syiar, ki sniang, ha kajuh ka por ka la pynshlur bad ai jingumut ïa ki paidbah nongrep jong ka shnong Thuruk ba ki dei ban shim ruh ïa ka kam ri jingri khnang ba ka ïoh ka kot jong ki kan kiew kaba long ka jingmyntoi ïa ki ha ka kamai ka kajih.
Katei ka heh sorkar jong ka tnat ka rep ka riang, ka la kyntu ïa ki paidbah kiba la ïa poi sha kane ka awareness prokram ba kin sngewbha ban pynsaphriang lem sha kiwei pat ïa ki jingtip ba ki la ïohlum na kane ka prokram ai jinghikai ba ki la ioh ha kane ka sngi.
Na ka liang ka ophis jong ka District Agriculture Office kan nang ïai bteng ban pynlong ïa kum kane ka prokram ai jingpynshai sah kiwei kiwei ki shnong ruh bad pynshlur bad ai jingmut , ai jingpynshai bad ai jinghikai ïa ki paidbah ha ka kam rep bad ka kam ri jingri.