Ban ïoh sdang noh ka tih dewïong,dang ap jubab ka Meghalaya na ka Coal Ministry

Shillong, K’Lyngkot 15 : Ka sorkar jylla ka dang ap mynta sa ïa ka jingmynjur bad ka jingai jingbit na ka Coal Ministry ha shwa ba kin ïoh sdang biang ïa ka kam tih dewiong da kaba pyndonkam pat da ka juk stad ne ka scientific mining ha kane ka jylla.
Haba kren bad ki lad pathai khubor ha kane ka sngi Balang, u Myntri Rangbah ka Jylla Conrad K Sangma u la ïathuh ba dang shen ha kine ki ar bnai ba la dep ka la don ka jingpynsngew paidbah na ka bynta ka rukom tih dewiong da ka juk stad mynta ïa kaba la pynlong ha ki lai tylli ki jaka.
“Hadien kane ki kot ki sla ki la leit biang sha ka tnad Forest bad sha ka Pollution Control Board bad la ïoh ruh ïa ka jingbit na ka tnad Forest and Environment bad Pollution Board bad mynta ki kot ki sla ki la poi sha Delhi,” u la ïathuh.
U Myntri Rangbah u la ong ba kaba sah mynta ka long sa tang ïa ka Coal Ministry ban ai ïa ka rai kaba khatduh hadien ba ka la dep ban peit ïa ki jingmynjur kiba la dep ïoh na ki tnad sorkar bapher bapher jong ka sorkar pdeng bad jong ka sorkar jylla.
“Ka jingmynjur kaba khatduh ka dei na ka Coal Ministry ban ai jingbit na ka bynta ban plie biang ïa ki par dewiong bad kata ka jingbit kaban ïoh na ka Ministry kadei hadien ba la biang lut,” u la ong.
Da kaba banjur ba ki paidbah ki dei ban sngewthuh ïa ki jingeh ha ka lynti ïaid kumno ban ïoh weng noh wat ïa ka jingkhang tih dewiong ba la pynjari da ka NGT, u Myntri Rangbah u la ong, “Kadei ka kam kaba eh bha kaba ngi hap ban bud ym dei eh tang ba ngi hap ban ïakhun bad ki agency bapher bapher la ka long bad ki kam ba ïadei bad ka NGT, kiwei pat ha Supreme Court kiba sa shisien pat ki long ki kam kiba da eh shisha kiba ngi la jop pat bad ïoh ban weng noh ïa ka jingkhang tih.”
Nangta u ong ruh ba ki hap ruh ban sdang ïa ka jingtih dewiong katkum ka juk mynta ryngkat ki kyndon bad ki aiñ kiba ïapher bha bad kiwei ki ri namar ka jingïapher ha ka rukom bat khyndew. Kumta u ong ba halor kane, na ka liang ka sorkar India ka hap ban don da ka kyndon kaba kyrpang na bynta ka Meghalaya namar ka rukom bat khyndew ka la ïapher hangne bad kane kadei sa kawei pat ka jingeh kaba khraw kaba ki kynduh.