Ban ïarap ïa ki paidbah ka thaiñ khappud ha shnong Huroi, shna ki shipai BSF da ka jingkieng siej

Khliehriat naiwieng 8: Ki shipai ïada khappud jong ka Border Security Force kiba don ha East Jaiñtia Hills District, ki la dep shna ïa kawei ka jingkieng kaba da ki siej hapoh shnong Huroi, East Jaiñtia Hills District bad ïa kane ka jingkieng la plie paidbah da u DIG, SHQ BSF Jowai, u Sandeep Rawat bad u Deputy Commissioner ka East Jaiñtia Hills District, u Abhilash Banarwal, IAS ha ka jingia don ryngkat lang u Commandant, 172 Bn BSF, u Sanjay Sharma lem bad ki nongshong shnong jong ka shnong Huroi.
Katkum u kyrwoh khubor ba la phah na ka tnat BSF, la ong ba kane ka jingkieng kan ïarap shibun ïa ki nongshong shnong ka thaiñ ha ka leit ka wan ka ban pynïasoh bad kiwei kiwei ki shnong kiba marjan, na ka liang ki nongshong shnong ki la pynpaw ka jingsngew nguh bad sngew kmen halor ka jingïoh ïa kane ka jingkieng bad ki la ai ruh ka jingïaroh ïa ka tnat shipai BSF kaba la shim ïa kane ka synjam ban shna jingkieng da ki siej bad ki la kyntu ïa ka tnat shipai bad kan sngewbha ban shna shuh shuh shibun kum kine ki jingkieng ha kiwei kiwei ki jaka ruh, ha ki jaka kiba don ki wah rit ban pynsuk ïa ki ban jam sha shiliang.
La ong ruh ba na ka liang ka tnat shipai BSF, kata lyngba ka CSR ka la don jingmut ban kyntiew shuh shuh sa ïa ka ïoh ka kot jong ki paidbah jong ka thaiñ da kaba pyntreikam ïa ki project bapher bapher ki ban kyntiew ruh ïa ka kamai kajih, ka ïoh ka kot jong ki longiïng jong ki paidbah ha ki shnong khappud.