Ban duna ki ksew surok, puid pynlyngki ïa ki ksew kynthei, shohdap ïa ki ksew shynrang

Shillong, Kyllalyngkot 4: Ryngkat bad kiwei ki jylla ha ka Ri India mynta ka sngi ki kynhun jong kito kiba ieit mrad kila pynlong ïa ka jingïakhih kaba jar jar kaba ar ki la sdang ha ka por 4.30 janmiet bad pynkut ha ka por 6.30 baja janmiet bad ha Meghalaya la pynlong ïa ka jingïakhih ha Khyndaidlad ha kaba ki phew ngut ki briew kila wan ban ïa shim bynta ha ryngkat ki jignthoh ha ki plakard.
Kawei na ki nongïashim bynta ka kong Tee Lyngdoh Mawlong haba kren ha ki lad pathai khubor kala ong ba ka jingpynlong ïa kane ka jingïakhih kaba jar jar ka long ban pynsngew sha ka ïing bishar kaba ha khlieh duh jong ka Ri India ka ban sa shongbishar ha kaba ïa dei bad ki ksew surok ha ka 7 Kyllalyngkot 2026.
Kaei kaba ka ïing bishar ha ka rai kaba la dep ka long ba ki sorkar kin buh ïa ki jaka ban buh ïa ki ksew surok, kaei kaba ki kwah ka long ba ka ïing bishar kaba ha khliehduh jong ka Ri India kan pynneh ïaka aiñ ABC kaba la don, kaba la kren shai ba dei ban kem ïa ki ksew surok shohdap ïa ki ksew shynrang bad puid pynlyngki ïa ki ksew kynthei.
La ong ba ha kane ka jylla Meghalaya ka sorkar kala shna ïa kum kane ka jaka ha Upper Shillong hynrei haduh mynta kam pat pyntrei kam, ban ong ban set ïa ki ksaw shijaka ka long kaba ym lah ban long namar ki ruh ki dei ki jingthaw ba im, ha kane ka jingïakhih kaba jar jar kaba la long ha Khyndailad la wan ban ïa shim bynta da baroh jaidbynriew.