Ban ai jinghikai ïa ki samla trai jylla ka Meghalaya kumno ban sengkam lajong

Shillong, Rymphang, 11: U Myntri Rangbah ka Jylla Conrad K. Sangma u la pynpaw ka jingkmen halor ka jingïasoi soskular Memorandum of Understanding (MoU) hapdeng ka AVENUES, Meghalaya bad ka Young Change Agents, Australia ha Melbourne ha ka 7 tarik mynta u bnai, ka ban plie lynti ïa ki samla ba dang khie dang san na ka jylla Meghalaya bad ïa kiwei kiwei ki jylla ka thaiñ Shatei Lammihngi ban ïoh ïa ki lad jingshah hikai pyntbit katkum ka jingïaid jong ka por kumno ban seng ïa ki kam ki jam lajong.
Haba ai khublei ïa ka Association lyngba ki kor internet, u Sangma u la ong, “la pynsngewthuh ïa nga ba kane ka jingïateh paralok ka thmu ban plie lad ïa ki samla ka jylla Meghalaya bad ka thaiñ Shatei Lammihngi shabar ka ri ba kin ïoh ïa ki jingshah hikai pyntbit kaba palat ar snem. Kan long ka jingsah kynmaw ha ka North East India bad kamtam eh na ka bynta ka roi ka par jong ki samla.”
U la bynrap, lyngba ka jingïatreilang hapdeng ka Avenues bad ka Young Change Agents, la khmihlynti ba da ki hajar ngut ki samla ka jylla Meghalaya bad ha ka thaiñ Shatei Lammihngi kin ïoh mynsiem ban phaikhmat ban seng ïa ki kam ki jam lajong,da ka jingkdew lynti.
Ha ka sien banyngkong eh la pynlong ïa ka jingïalang ha ka 6 tarik mynta u bnai ha Melbourne, Australia bad lyngba kane ka jingïalang la ïasoi ïa ka Memorandum of Understanding hapdeng ka Avenues, Meghalaya bad ka Young Change Agents.
Ïa ka jingai jingmynjur la lamkhmat da ka Tiffani Seaton, Indigenous Engagement Lead, Young Change Agents.
Ka Margaret O’Brien, kaba dei ka CEO jong ka Young Change Agents, ka la ïasam ïa ki jingtip bad ïa ki jingai jinghikai halor kane ka phang.
“Ngi sngewkmen ban ïatreilang bad ka Avenues ha North East India, ka ban plie lynti ïa ki samla bad ngi khmihlynti ruh ban pynwandur thymmai ïa kane ka jingïatreilang da kaba phaikhmat sha ki samla ban ai jinghikai ha ka sengkam sengjam,” ka la ong.
U Founder bad CEO jong ka AVENUES Meghalaya u Mark Laitflang Stone, u la ong, “kane ka jingïalang kan sah jingkynmaw na ka bynta ki samla jong ka thaiñ Shatei Lammihngi. Kan long ruh ka sien banyngkong eh ban ïasam jingtip halor ki jingai jinghikai halor ka sengkam sengjam na ka bynta ki samla riewlum hapdeng ki ar tylli ki ri. Ka jingïatreilang bad ka Young Change Agents kan ïarap ïa ngi ban plie ïa ka jingmut jingpyrkhat jong ki samla riewlum, ha ka lynti kaba ki samla kin ïoh jingshaniah bad kin sngewthuh ïa ka jingshisha kaba lah ban urlong.’