Watla ki don bun ki party kiba treilang ha kane ka Sorkar synrop jong ka Meghalaya Democratic Alliance hynrei kaba paw shabar mynta pat ka long ba dei tang ka National People’s Party kaba shim lut ia ki rai ha ka Sorkar jylla. Lah ban kdew hangne ba ki party ba thaw ia ka sorkar MDA ki kynthup naduh ka NPP, ka United Democratic Party, ka Peoples Democratic Front, ka Hills State People Democratic Party, ka Bharatiya Janata Party, ka Nationalist Congress Party bad ruh ki MLA shimet kynthup ia kito kiba shah sospon ha ka Congress.
Tangba ha kawei pat ka liang la ïohi ba ka jingkynthoh ka thew beit tang ia ka NPP. Ym lah ban tip kaei ka daw kaba pynlong ia ki nongkynthoh ban ïohi tang ia kawei ka party ha ba don bun ki party ba treilang. Ka jingkitkhlieh kadei ban ngat lang ha baroh ki party khamtam kum ki party heh kiba kyrshan borbah ia ka NPP kum ka UDP bad ruh ka PDF kiba lada khlem ka jingkyrshan jong kitei ki party khamtam eh ka UDP na ka liang ka NPP da lei lei kan ym lah ban rai ei ei. Jan baroh ki Ishu ba ka sorkar ka shim lehse lada dei kaba bha ia ka jingiaroh baroh ki party ba don ha ka sorkar kin kam ba ki donkti lang hynrei lada dei pat ia ka Ishu kaba kynrum kynram lada tyngkhuh bad ki paidbah lehse baroh ki party kin kiar ban kam ba ki donkti lang.
Ha kum kane ka por lada jia ba ka Ishu pynkynriah ia ki briew ba sah ha Themiewmawlong ka urlong shisha shwa ka elekshon MLA ha u 2023 lehse ka jingiakam nongkynti kan long beit da baroh ki party kiba don ha ka sorkar. Kane ka Ishu lada ka seisoh lehse kan shongshit bha ha ki rynsan elekshon ha kylleng ki bynta jong ka jylla khamtam eh ha kito ki constituency kiba don ha Rilum Khasi bad Jaintia.
Tangba lada jia ba kane ka Ishu kam pat dep lehse kan pynlong ia ki MLA ba don ha ka Liang Pyrshah ban ioh dong kylla bad kynthoh har-rukom. Kumba long mynta hi kiba bun ki MLA kiba don ha kane ka sorkar Meghalaya Democratic Alliance ki don ha ka jingkyrmen ba ki lah ban wanphai biang sha ka bor lada jia ba kim don shuh ne ki mih ki jingjia kiba lah ban pynmhihwin ia ki paidbah nongthep vote. Tangba ha kawei pat ka liang ka jingjop jingrem jong ki MLA ka shong eh ruh kumno ki treikam pat ha ki constituency jong ki. Kawei ka shong ruh kiba kumno ki kyrtong ki wan ban iakhun pyrshah ia ki.
Ha kawei pat ka liang ym lah ban len ba ka All India Trinamool Congress kaba don mynta ha ka Liang Pyrshah khlem artatien kan pynduh thiah ia baroh ki 60 tylli ki constituency khamtam eh ha ki 48 tylli ki constituency kiba don ha ka Liang Synshar. Hynrei ha ka politik ha Meghalaya pat baroh ki lah ban kylla khongpong pat tang ha ka shi khyllipmat bad ym lah ban tip ba ioh na ki 12 ngut ki MLA ka Congress kiba pyniasoh sha ka Trinamool Congress lah ruh ban ong ba ki lah ban leit iasoh noh sha kawei pat ka party shwa ka elekshon.
Lada peit na jinglong jingman ha ka saiñpyrthei haduh mynta hi ka jingiakhun ha ka elekshon ha u 2023 kan dei beit la kumno kumno hapdeng ka UDP bad NPP bad na ki 60 constitiency la kumno kumno 20 haduh 25 tylli tylli tylli ki constituency tangba ym lah ban ong napdeng kine ki constituency kaei ka party kaban jop bun. Lehse lada ki jop mar shiteng ruh ha Rilum Khasi Jaiñtia ka shong pat ha ki 24 tylli ki constituency ba don ha Rilum namar ha katei ki thaiñ ka jingiakhun khlem pep kan dei beit hapdeng ka NPP, TMC bad ruh katto katne tylli bad ka BJP lane ki kyrtong shimet nalor kiwei kiwei. Kumta ka shong ruh ha ka jingjop na Rilum Garo kaba kumno ka sorkar kaban wan hadien ka elekshon jong u 2023.
Ym lah ruh ban ong ba ka shong ruh ha ka jingpynlut ki kyrtong ha kane ka elekshon ban khroh ia ki nongialam hapdeng kitei ki party ban kyrshan ia ki na ka bynta ka jingjop. Sa tang ka por kaban batai kaba kumno ka sorkar ka jylla kan ioh la kan wan biang ka MDA lane da kawei pat. Ym lah ruh ban tip ioh dei da kiwei pat ki party kiban ïalam ka ka sorkar. Ka jubab ka sah mynta sa tang lai ne saw bnai bad ka shong ruh ha ka rai kaba stad jong ki nongshong shnong ka jylla.
