Nongstoiñ, Risaw 27: Ïa ka National Deworming Day (NDD), la plie pyrda da u Additional Deputy Commissioner bah M.Diengdoh MCS ha Conference Hall, office jong ka DM&HO, Nongstoiñ mynta ka sngi ha ka jingdon ryngkat lang jong ka DM&HO Dr SA Lyngdoh, ki Doctor, ki nongtrei jong ka Health Department bad ki Ophisat na ki tnad bapher bapher. Ïa kane ka prokram la pynlong da ka ophis jong ka District Medical & Health Officer, Nongstoiñ.
Haba ai jingkren u bah M.Diengdoh, u la pynpaw ïa ka jingkmen ban ïa don bynta ha kane ka programme kaba thmu ban ai jingmyntoi ïa ki paidbah lyngba ka tnad ka koit ka khiah. U la ong ba ka jingplie ïa kane ka programme kan ai jingmyntoi ïa ki khyllung khynnah ban rat dyngkhong ïa u wieh bad ka jingpang duna snam.
U la ban ba dei ban don ka jingïatreilang jong baroh ki tnad sorkar ban pynsngewthuh ruh ïa ki paidbah ban ym sheptieng ïa kino kino ki jingïarap jong ka Sorkar lyngba ka Health Department, khnang ban ïoh ïa ka jingjop halor kane ka mission. U la ong ba lyngba kane ka programme, ai ba iwei ruh in ym duh ïa kane ka jingïarap bad kyrmen ba kan long ka jingmyntoi kaba khraw ïa ki paid nong shong shnong bad kan long ruh kaba jop.
Katba ka Doktor S.A Lyngdoh ha ka jingkren jong ka ka la ong ba dei ban lehkhuid khamtam ban sait bha ïa ki kti ban khap bha ïa ki tyrsim, khnang ba u wieh un ym ïoh rung ha ka met u briew. Kiwei kiba la ai jingkren ki long u Dr R Laloo bad ka kong I Gymphad DPM kaba la ai ïa ka jingkren khublei pynwai.
